هاتوچۆ بڕیارێکی لەسەر ئۆتۆمبێلی بێسەرەتا دەرکرد

-

بەڕێوەبەرایەتی هاتوچۆ هۆشداریی توند دەدات لە بارەی ئۆتۆمبێلی
بێسەرەتا و ڕایدەگەیەنێت، هیچ جۆرە چاوپۆشییەک بۆ ئۆتۆمبێلی بێسەرەتا و بڕاوە ناکەن
و ڕاستەوخۆ دەستیان بەسەردا دەگرن.

بەڕێوەبەرایەتیی
هاتوچۆی ئیدارەی ڕاپەڕین لە راگەیەندراوێکدا رایگەیاند، دیاردەی ئۆتۆمبێلی بێسەرەتا
و بڕاوە تەنها سەرپێچییەکی هاتوچۆ نییە، بەڵکو هەڕەشەیەکی ڕاستەوخۆیە بۆ سەر ئاسایشی
نیشتمانی، بۆیە مەفرەزەکانیان ڕاسپاردووە بە توندترین شێوەی یاسایی مامەڵە لەگەڵ ئەو
جۆرە ئۆتۆمبێلانەدا بکەن و دەستیان بەسەردا بگرن.

لە بەشێکی دیکەی ڕاگەیەندراوەکەدا هاتووە، سەلامەتیی گشتیی
هاوڵاتیان هێڵی سوورە و ڕێگە بە هیچ کەسێک نادرێت بەهۆی لێخوڕینی بێ مۆڵەت یان
دروستکردنی دەنگی نائاسایی، ژیانی خەڵک بخاتە مەترسییەوە و ئارامیی شەقامەکان تێکبدات،
هەر کەسێکیش ئەو سنوورانە ببەزێنێت، ڕووبەڕووی سزایەکی قورس و بێ گەڕانەوە دەبێتەوە.

ئاماژە بەوەش دەکات، بۆ کۆنترۆڵکردنی زیاتری سنوورەکان و
ناو شارەکان، پلانێکی تۆکمەیان لەگەڵ هێزە ئەمنییەکان داڕشتووە، تاوەکو یاسا ببێتە
تاکە حاکم لەسەر شەقامەکان و ئاسایش و سەلامەتیی خەڵک بپارێزرێت.