هاتووچۆی سلێمانی: کامێراکانی رێگەی نێوان سلێمانی – تاسڵوجە دەکەونەکار

-

بەڕێوەبەرایەتیی هاتووچۆی سلێمانی رایدەگەیەنێت، کۆتایی ئەم هەفتەیە کامێراکانی تۆمارکردنی تیژڕەوی رێگەی نێوان سلێمانی – تاسڵوجە دەکەونەکار.

ئەمڕۆ سێشەممە 26ی ئابی 2025، بەڕێوەبەرایەتیی هاتووچۆی سلێمانی رایگەیاند، “بەڕێوەبەرایەتی هاتووچۆی سلێمانی ئاگاداری شۆفێرانی بەڕێز دەکات کە لە ڕێکەوتی 28/8/2025 پێنج شەممە کاتژمێر 10 ی سەر لەبەیانی کامێراکانی رێگەی نێوان سلێمانی – تاسڵووجە وە بە پێچەوانەوە (کامێراکانی تۆمارکردنی تیژڕەوی) دەکەونەکار و تۆمارکردنی سەرپێچی تیژڕەوی بە سیستەمی (One Point) و بەپێی ئەو خێراییانەی کە لە هێماکانی هاتووچۆی تەنیشت ڕێگاکە دانراون تۆمار دەکات”.

ئاماژە بەوەکراوە، “سەبارەت بە رێگەی نێوان سلێمانی – وارماوا بەهەمان شێوە کامێراکان دانراون لە رێکەوتی 28/8/2025 کاتژمێر 10ی سەرلەبەیانی سزای سەرپێچی خێرایی تۆمار دەکەن بە سیستەمی Point to Point بەپێی ئەو خێراییانەی دیاریکراوە لە رێگەی هێماکانی هاتووچۆوە، ماوەی لێبووردن لە کامێراکانی خێرایی (حدود التسامح) بۆ ئۆتۆمبێلی بچووک (پێنج) کیلۆمەترە وە بۆ بارهەڵگر (سێ) کیلۆمەترە”.

ئەوەشخراوەتەڕوو، “سەبارەت بە میکانیزمی تۆمارکردنی سەرپێچی تیژڕەوی لەو کامێرایانەی بە سیستەمی Point to Point کار دەکەن، تێکڕای خێرایی لە هەموو کامێراکان هەژمار دەکرێت، بۆ نموونە لە نێوان دوو کامێرا پێویستە شۆفێر بە خێرایی رێگەپێدراو کە دیاریکراوە شۆفێری بکات بە پێچەوانەوە سزای دیاریکراو دەدرێت، هەروەها لەنێوان کامێراکانی دیکەدا ئەگەر شۆفێر لەسەر تیژڕەوی بەردەوام بوو هەمان سزا دووبارە دەیگرێتەوە”.

هاتووچۆی سلێمانی دەشڵێت، “میکانیزمی سەرپێچی تۆمارکردنی تیژڕەوی لە کامێراکان بەپێی فەرمانی وەزارەتی ناوخۆ ڕێکخراوە، واتە سەرجەم بەڕێوەبەرایەتییەکانی هاتووچۆ لە هەرێـمی کوردستان بە یەک سیستم کاردەکەن بێ جیاوازی لەو شەقام و رێگایانەی ناوەوە و دەرەوەی شارەکان لە هەرێم کە کامێراکانی تیژڕەوی تیادایە”.