چۆن سلێمانی لە پایتەختی ڕۆشنبیرییەوە کرایە شارێکی پەراوێزخراو

جوتیار کەمال جەبار

لە زۆنی سەوز، کاتێک گوێت لە وشەکانی “پاراستنی شکۆی سلێمانی، بەهێزکردنی ئابووریی شار، یان ڕێگریکردن لە پیلانەکان” دەبێت، بزانە کە دەسەڵاتدارانی یەکێتی خەریکی شاردنەوەی شکستێکی گەورەتر یان ڕادەستکردنی بەشێکی تری هەژموونی ئەم شارەن! لێرە، لەدەستدانی ڕۆڵی سیاسی و ئابووریی سلێمانی بە ڕێکەوت ڕوو نادات؛ بەڵکو “لاوازکردنی بەئەنقەستی شارەکە بۆ پاراستنی بەرژەوەندییەکانی مەکتەبی سیاسی” خۆی لە خۆیدا گەورەترین ستراتیژی و شێوازی حوکمڕانیی یەکێتییە. ئەوان فێربوون کە باشترین ڕێگە بۆ کۆنترۆڵکردنی شارێک کە پێشتر سەرچاوەی شۆڕش و ناڕەزایەتی بووە، “خنکاندنیەتی لەناو قەیرانی ئابووری و دابڕینیەتی لە ناوەندی بڕیاری سیاسی”. بۆیە دەبینین سلێمانی ڕۆژ لە دوای ڕۆژ پێگەی خۆی لەدەست دەدات، و لەبری ئەوەی بڕیاردەر بێت، بووەتە قوربانیی مامەڵە ژێربەژێرەکان!

با سەیری ئەم پاشەکشێ ئابوورییە بکەین. بۆچی شارێک کە خاوەنی گەورەترین دەروازەی سنووری و زۆرترین باجە، سەرمایەدارەکانی لێی ڕادەکەن و پڕۆژەکانی تێدا وەستاون؟ ئایا لەبەر ئەوەیە کە بازاڕی نییە؟ نەخێر، ڕۆژانە ملیۆنان دۆلار داهاتی ئەم شارە دەچێتە گیرفانی کۆمپانیاکانی حیزبەوە، بەڵام ئابوورییەکەی دادەڕمێت چونکە “سەپاندنی شەراکەتی زۆرەملێ لەسەر وەبەرهێنەران و وەرگرتنی سەرانە” باشترین چەکە بۆ ئەوەی حیزب تەواوی جومگەکانی ژیان کۆنترۆڵ بکات. کاتێک تۆ ئامادە نیت ڕێگە بە هیچ سەرمایەدارێک بدەیت کار بکات ئەگەر پشکی شێرت نەداتێ، ئیتر چۆن چاوەڕێی گەشەسەندن دەکەیت؟ ئەوان بازاڕیان کوشتووە، پارەی بانکەکانیان دزیوە، و پاشان پاساو دەهێننەوە کە “هەولێر سزامان دەدات!”

هەمان سیاسەت لە لەدەستدانی پێگەی سیاسیی شارەکەشدا جێبەجێ دەکرێت. سلێمانی کە ڕۆژگارێک چەقی بڕیاردانی سیاسی و دروستکردنی ئۆپۆزسیۆنی ڕاستەقینە بوو، ئێستا کراوەتە بارمتەی ڕێککەوتنە ئەمنییەکان لەگەڵ بەغدا و تاران. یەکێتی ئەم شارە بەکاردهێنێت نەک بۆ خزمەتکردنی خەڵکەکەی، بەڵکو وەک “کارتێکی فشار بۆ وەرگرتنی پۆست لە بەغدا یان پارە لە هەولێر”. کاتێک تۆ بڕیاری سیاسیی شارەکەت ڕادەستی ئەجێندای دەرەکی دەکەیت و ئازادییەکان بە ناوی پاراستنی ئەمنییەتەوە پێشێل دەکەیت، ئیتر سلێمانی هیچ ڕۆڵێکی نامێنێت جگە لەوەی ببێتە پاشکۆیەکی بێدەسەڵات لە هاوکێشەکاندا.

تەنانەت کاتێک باس لە “ئازادی و ڕۆشنبیری” دەکرێت، ئەم دەسەڵاتە تەنها ڕێگە بەو دەنگانە دەدات کە مەترسی نین بۆ سەر بەرژەوەندییەکانی. کێشەی بێکاری، داڕمانی ژێرخان، و بێهیوایی گەنجان بە مەبەست بە هەڵپەسێردراوی دەهێڵرێنەوە، تا خەڵک بێهیوا ببێت و قبوڵی بکات کە چارەنووسی سلێمانی ئەوەیە هەمیشە “قوربانیی ململانێی دوو حیزبەکە” بێت.

“ئەو شارانەی کە ئیرادەیان لێ دەسەندرێتەوە، لە مەرگێکی هێواشدا دەژین بێ ئەوەی هەستی پێ بکەن.” ئەمڕۆ یەکێتی لە سلێمانی بە زەبری “تاڵانکاریی ئابووری و سەپاندنی ترس” دەیەوێت ئەم شارە بخاتە ناو ئەو مەرگە هێواشەوە و کەرامەتی خەڵکەکەی بشکێنێت.