تەندروستی سلێمانی: پەتای سكچوون و رشانەوە لەناو منداڵاندا دەستی پێكردووە
-
ئەمڕۆ پێنجشەممە 11ی حوزەیرانی 2026، دكتۆر كۆیان زاهیر، بەڕێوەبەری نەخۆشخانەی منداڵان لە سلێمانی لە لێدوانێکدا بۆ راگەیانەکان، هۆشداریی دەداتە دایكان و باوكان لەبارەی دەسپێكردنی پەتای وەرزی و رایدەگەیەنێت كە حاڵەتەكانی سكچوون و رشانەوە زیادیان كردووە، بەڵام توند نین.
راشیگەیاند، “بەهۆی ئەوەی ئەمساڵ كەشووهەوا لەپڕ گەرم نەبوو، ئەمە بووە هۆی دواكەوتنی بڵاوبوونەوەی پەتای سكچوون و رشانەوە كە لە وەرزە گەرمەكاندا باوە، بەڵام ئێستا نەخۆشییەكە دەستی پێكردووە و نەخۆش لە نەخۆشخانەكان داخڵ دەكرێن”، بەڵام ئاماژەی بەوە كرد، كە “ئەو حاڵەتانەی ئێستا هەن توند نین و هیچ گیانلەدەستدانێك تۆمار نەكراوە، بۆیە دۆخەكە بە تەواوی لەژێر كۆنترۆڵدایە”.
لەبارەی رێكارە خۆپارێزییەكانەوە، بەرێوەبەری نەخۆشخانەی منداڵان كۆمەڵێك رێنمایی ئاراستەی دایكان و باوكان كرد و وتی: “پێویستە دایكان و باوكان پاكوخاوێنی منداڵەكانیان رابگرن، بەتایبەت لە كاتی چوونیان بۆ مەلەوانگە، سەیرانگاكان و خواردنی دەرەوە”.
هەروەها جەختی لەسەر گرنگیی دەستشۆردنی بەردەوام كردەوە و رێنمایی ئەو دایكانەشی كرد كە شیری قوتوو دەدەن بە منداڵەكانیان، كە پێویستە بەردەوام مەمەی منداڵەكانیان تەعقیم بكەن بۆ رێگری لە گواستنەوەی هەر جۆرە ڤایرۆس و بەكتریایەك.
Post Comment