وەزارەتی پەروەردە: فرۆشتنی هەموو جۆرەکانی چپس لەناوەندەکانی خوێندن قەدەغەیە
-
لەپێناو پاراستنی تەندروستیی قوتابیان چەند ڕێکارێکی خۆپارێزی لە ناوەندەکانی خوێندن گیراوەتەبەر، لەوانە قەدەغەکردنی چپس لە فرۆشگای ناوەندەکانی خوێندن، وەزارەتی پەروەردەش دەڵێت: بڕیارەکە لەلایەن وەزارەتی تەندروستی دراوە و ئێمەش جێبەجێی دەکەین.
بەڕێوەبەرایەتیی گشتیی پەروەردەی هەولێر، نووسراوێکی ئاراستەی سەرجەم بەڕێوەبەرایەتییەکانی پەروەردەکانی کردووە، ئاماژە بەوەکراوە، چپس خراوەتە ناو لیستی خۆراکە قەدەغەکراوەکان و لەڕووی تەندروستییەوە رێگەپێدراو نییە.
باسی لەوەش کردووە، هەنگاوەکە لەسەر بنەمای نووسراوی وەزارەتی پەروەردە و تەندروستی بڕیاری لەسەر دراوە.
هاوکات پەیمان خواجە، وتەبێژی وەزارەتی پەروەردەی هەرێمی کوردستان دەڵێت: لەم بابەتە ئێمە لایەنی بڕیاردەر نین، بەڵکو لایەنی جێبەجێکارین.
وتەبێژی وەزارەتی پەروەردە دەشڵێت: ساڵانە لەکاتی دەستپێکردنی خوێندن، وەزارەتی تەندروستی نووسراوێکی گرێدراو بە ئاسایشی خۆراکمان بۆ دەنێرێت، هەندێک خواردن لەنێو نووسراوەکەدا قەدەغە دەکات، ئێمەش بە لەبەرچاوگرتنی تەندروستی قوتابییان بڕیارەکە وەک خۆی جێبەجێ دەکەین.
Post Comment