عەلی باپیر: بەشێک لە ئۆپۆزسیۆن دروستکراون؛ وەک کۆلارە هەڵیان دەدەن و کاتێک ئیشیان پێیان نەما دەینیشێننەوە
_
عەلی باپیر، سەرۆکی کۆمەڵی دادگەریی کوردستان لە دیداری میری رایگەیاند، دەبێت لەگەڵ باشییەکانی هەر کەسێک بین؛ وە دژی هەر خراپەیەک بین ئەگەر خۆشمان بین. بەڵام لێرە حیزب دامەزراوەکان قوت دەدات و لە حکومەت گەورەترە. دەشڵێت: من هەر زوو وتم پەرلەمانی کوردستان دیزاین کراوە و پێ ناگرێت.
عەلی باپیر وتی: ئێمە نە حکومەتمان ستانداردە، نە ئۆپۆزسیۆنیش توانیویەتی ببێتە شوێنگرەوەی یەکێتی و پارتی، لە هەرێمی کوردستانەی ئێمەدا، ئەگەر حیزب پەرلەمانی بەدڵ نەبێت، دایدەخات.
ئاماژەی بەوەشکرد، هیچ باسی حیزبەکانی دەسەڵات ناکەم چونکە دەزانم هیچ لە بابەتەکە ناگۆڕێت. دەشڵێت: زۆر نا ئومێدم لەم دوو حیزبە و چەندین ساڵە هیچ نەگۆڕاوە.
بە وتەی عەلی باپیر، بەشێک لە ئۆپۆزسیۆن دروستکراون، وەک کۆلارە هەڵیان داوە و کاتێک ئیشیان پێیان نەما، دەینیشێننەوە، بەشێکی دیکەشیان هێندە داخراون کە ئامادەنین بچنە قاڵبێکی دیکەوە.
وتیشی: چەندین جار داوام کردووە کورد یەکدەنگ بێت و هەوڵمانداوە کۆدەنگی دروست بکەین بۆ بەغدا، بەڵام بە دەسمانەوە نەهاتوون.
باسی لەوەشکرد، حیزبەکانی دەسەڵات هەوڵدەدەن هەندێک کارەکتەری لایەنە ئۆپۆزسیۆنەکان بکڕن و دەستەمۆیان بکەن و چیتر خەڵكی متمانەی پێیان نەمێنێت.
Post Comment