مەسرور بارزانی جەخت لە روبەڕوبونەوەی گەندەڵی و پاراستنی سامانی گشتی دەکاتەوە
-
ئەمڕۆ یەکشەممە 26ی تەمووزی 2026، مەسرور بارزانی، سەرۆکی حکومەتی هەرێمی کوردستان، پێشوازی لە ئەحمەد ئەنوەر، سەرۆکی دەستەی دەستپاکی هەرێمی کوردستان کرد.
بەپێی راگەیەندراوی کۆبونەوەکە، سەرۆکی دەستەی دەستپاکی کورتەیەکی لەسەر کار و چالاکییەکانی دەستەکەیان لە ماوەی رابردوودا خستەروو و باس لە هەنگاوەکانی بەرەنگاربونەوەی گەندەڵی لە دامودەزگاکانی هەرێمی کوردستان کرا.
لە دیدارەکەدا، مەسرور بارزانی جەختی لە گرنگیی بەهێزکردنی هاوئاهەنگی و هاریکاری نێوان سەرجەم دەزگا دارەکانی هەرێمی کوردستان کردەوە، بە ئامانجی روبەڕوبونەوەی گەندەڵی و رێگریکردن لە هەر جۆرە بەهەدەردانێکی سامانی گشتی.
سەرۆکی حکومەت پابەندبوونی تەواوی حکومەتی هەرێمی بۆ بنبڕکردنی گەندەڵی بە هەموو جۆرەکانییەوە دوپاتکردەوە، هەروەها ئاماژەی بەوە کرد کە حکومەت ئامادەیە هەموو ئاسانکاری و هاوئاهەنگییەک بۆ دەستەی دەستپاکی دابین بکات، تاوەکو بتوانن بە شێوەیەکی کاریگەرتر بەردەوام بن لە پرۆسەی بەرەنگاربونەوەی گەندەڵی و پاراستنی دارایی گشتی.
Post Comment