بارودۆخی خەڵکی هەرێمی کوردستان بەدەست حکومەتەوە!

نەهرۆ سەباح – چالاکوان

حکومەت داوا دەکات خەڵک قەرزی کارەبای خۆیان بدەنەوە، و بە هەڕەشە و فشار دەیەوێت ئەو پارەیە لە خەڵک وەربگرێت. بەڵام لە هەمان کاتدا، هەمان ئەو خەڵکە کە دەبێت قەرزی کارەبا بداتەوە، چاوەڕێی مووچە و مافە داراییەکانی خۆیەتی.

ئەگەر خەڵک پابەندە بە پارەدان، حکومەتیش دەبێت پابەند بێت بە پارەدان، چۆن لە هاووڵاتییەک داوا دەکرێت قەرزی خۆی بداتەوە، کاتێک مووچەکەی بە کاتی خۆی و بە تەواوی ناداتێت؟ چۆن لە خەڵک داوای پابەندی دەکرێت، بەڵام پابەندی بەرامبەر بە مافەکانی خۆی بە هەمان شێوە نابینێت؟

خەڵکی کوردستان داواکار نییە بەڵکو خاوەنی مافە، مووچە و داهاتی خەڵک میهرەبانیی حکومەت نییە، بەڵکو مافەکانیانە، ئەگەر حکومەت دەڵێت «قەرزەکانتان بدەنەوە»، خەڵکیش مافی ئەوەی هەیە بپرسێت:

مووچەکانی ئێمە کەی دەدرێن؟

مافە داراییەکانی ئێمە کەی دەدرێن؟

بۆچی یاسا و پابەندی تەنها بۆ هاووڵاتییە و بۆ حکومەت نییە؟

ئەم شێوەیەی مامەڵەکردن لەگەڵ خەڵک نابێت ببێتە شتێکی ئاسایی، خەڵک دەبێت مافی خۆی وەربگرێت، پێش ئەوەی داوای قەرزی لێ بکرێت…!