ئێران بە چوار مووشەکی بالیستی بارەگایەکی پارتی ئازادیی کوردستانی لە هەریر بۆردوومان کرد

-

پارتی ئازادیی کوردستان (پاک) رایگەیاند، بارەگایەکی سەربازیی هێزەکانیان لە هەرێمی کوردستان لەلایەن کۆماری ئیسلامیی ئێرانەوە بە مووشەکی بالیستی کراوەتە ئامانج.

بەپێی راگەیەندراوێکی پارتی ئازادیی کوردستان، لە دەوروبەری کاتژمێر 9:10 بۆ 9:22 خولەک، ئێران لە هێرشێکی هاژەکیدا یەکێک لە بارەگاکانی هێزی “سپای میللیی کوردستان”ی لە دەڤەری نێوان هەریر و بالیسان بۆردوومان کردووە.

ئەو حزبە روونیشیکردووەتەوە، لە هێرشەکەدا تا ئێستا 4 مووشەکی بالیستی هاوێژراون و ئاراستەی پێگەکەیان کراون.

هاوکات پارتی ئازادیی کوردستان دڵنیایی داوە کە پێشوەختە بارەگاکەیان چۆڵکردووە، بەو هۆیەشەوە هێرشە مووشەکییەکە هیچ زیانێکی گیانی لە ریزەکانی هێزی پێشمەرگەی ئەواندا لێنەکەوتووەتەوە.