کوشتنی ژنان بە بیانووی شەرەف

کۆچەر اسماعیل – چالاکوان

کوشتنی ژنان بە بیانووی شەرەف یەکێکە لە کێشە گەورە و مەترسیدارەکانی کۆمەڵگای عێراق. هەموو ساڵێک ژنان بەهۆی گومان، ناکۆکی خێزانی، نەبوونی ئازادی و کۆنترۆڵکردنی ژیانیان دەبنە قوربانی توندوتیژی و کوشتن.

یەکێک لە هۆکارە گرنگەکانی بەردەوامبوونی ئەم دیاردەیە لاوازی جێبەجێکردنی یاسا و کەمی پاراستنی ژنانە. حکومەت بەرپرسیارە لە پاراستنی ژیانی هاووڵاتیان، بەڵام کاتێک ژنان هەست بە ئاسایش ناکەن و ناتوانن بە ئازادی داوای یارمەتی بکەن، ئەوا پرسیاری جدی لەسەر کاری حکومەت دروست دەبێت.

حکومەت نابێت تەنها دوای ڕوودانی کوشتن هەڵوێست وەربگرێت؛ بەڵکو پێویستە پێش ڕوودانی تاوان ژنان بپارێزێت. پێویستە پەناگەی سەلامەت بۆ ژنانی مەترسیدار دابین بکات، سکاڵاکانیان بە جدی وەربگرێت و تاوانباران بەبێ هیچ جیاوازییەک سزا بدات.

هەروەها زۆری چەک و چەکی نایاسایی لە کۆمەڵگادا مەترسییەکی گەورەیە. حکومەت دەبێت کۆنترۆڵی چەک بەهێز بکات و ڕێگە لە بەکارهێنانی چەک بۆ هەڕەشە و کوشتنی ژنان بگرێت.

پرسیاری ئێمە ئەوەیە: بۆچی ژنێک دەبێت بەهۆی داواکردنی مافی خۆی یان بیانووی شەرەف بکوژرێت؟ بۆچی هەندێک ژن پێش ئەوەی تاوانێکیان بەرامبەر بکرێت، پاراستنیان بەدەست ناگات؟ و بۆچی هێشتا ئەم کێشەیە چارەسەری بنەڕەتی و بەردەوامی نییە؟

شەرەف کوشتن نییە؛ شەرەف پاراستنی ژیانە. ژنان مافی ژیان و ئازادییان هەیە.