لە دەوڵەتەوە بۆ عەشیرەت: کاتێک “ئاغا”کان یاسا و دادگاکان دەخەنە ژێر پێڵاوەکانیانەوە!
سەرکەوت رەمەزان علی
ئەگەر پێت وایە هەرێمی کوردستان خاوەنی “دامەزراوەی مەدەنی” و “دەوڵەتداری”یە، ئەوا لە خەیاڵێکی گەورەدا دەژیت! لە پشتی ئەو دروشمە بریقەدارانەی دیموکراسی و پەرلەمانەوە، ئەوەی لە واقیعدا حوکمی هەرێمی کوردستان دەکات، سیستەمێکی نیۆ-تریبایزم (عەشایەریی نوێ) و مافیای خێڵەکییە کە تێیدا “ئاغا” و سەرۆک عەشیرەتەکان لە سەرووی یاسا، دادگا، و تەنانەت حکومەتیشەوەن. پارتی و یەکێتی لەبری دروستکردنی دەوڵەتێک بۆ هاوڵاتییان، بوونەتە سپۆنسەری ئەم سیستەمە دەرەبەگایەتییە و پەیماننامەیەکی قێزەونیان لەگەڵ سەرۆک هۆزەکاندا مۆر کردووە: “ئێوە دەنگ و چەکدارمان پێبدەن بۆ مانەوە لە دەسەڵات، ئێمەش پارە، چەک، و پارێزبەندیی یاساییتان پێدەدەین بۆ ئەوەی هەر تاوانێک بتانەوێت بیکەن!
ئەم ئاغا و سەرۆک عەشیرەتانە، کە زۆربەیان وەک ڕاوێژکاری حیزبی یان فەرماندەی سەربازی دامەزراون، بوونەتە دەوڵەتێک لە ناو دەوڵەتدا. کوڕەکانیان و چەکدارەکانیان بە ئارەزووی خۆیان زەویی گشتی و موڵکی هاوڵاتییان داگیر دەکەن، تەقە لە خەڵک دەکەن، و تەنانەت ڕۆژنامەنووسان و چالاکوانانیش تیرۆر دەکەن، بەڵام چونکە پشتیوانیی حیزبیان هەیە، هیچ دادگایەک ناوێرێت تەنانەت بانگهێشتیشیان بکات! دادگاکانی هەرێم لەبەردەم ئەم ئۆلیگارشییە خێڵەکییەدا بە تەواوی ئیفلیج بوون و تەنها بۆ سزادانی هاوڵاتیی بێدەسەڵات کار دەکەن. کاتێک تاوانێکی گەورەش ڕوودەدات و فشاری شەقام دروست دەبێت، حیزب و عەشیرەتەکان لەژێرەوە “سوڵحی عەشایەری” دەکەن و تاوانبارە ڕاستەقینەکە دەشارنەوە یان کەسێکی بێتاوان دەدەنە دادگا وەک قوربانی. ئەمە حوکمڕانی نییە، ئەمە یاسای دارستانە کە تێیدا چەک و پارەی سەرۆک هۆزەکان مافی ژیان دیاری دەکات
کارەساتەکە لەوەدایە کە تەنانەت پڕۆسەی دیموکراسی و هەڵبژاردنەکانیش کراونەتە ئامرازێک بۆ بەهێزکردنی ئەم سیستەمە دواکەوتووە. حیزبە دەسەڵاتدارەکان لەبری کاندیدکردنی کەسانی خاوەن بڕوانامە و لێهاتوو، کوڕ و خزمەکانی ئەم ئاغایانە دەخەنە لیستەکانیانەوە بۆ پەرلەمانی کوردستان و عێراق، تەنها بۆ ئەوەی دەنگی عەشیرەتەکانیان مسۆگەر بکەن. لە بەرامبەریشدا، ئەم سەرۆک هۆزە چەکدارانە لە ڕۆژی دەنگداندا نەک تەنها خەڵکەکەی خۆیان ناچار دەکەن، بەڵکو بە زەبری چەک و هەڕەشە دەستتێوەردان لە کۆمیسیۆن دەکەن و ساختەکاری بۆ کاندیدەکانیان ئەنجام دەدەن. بەم شێوەیە، پەرلەمان لەبری ئەوەی نوێنەری گەل بێت، دەبێتە دیوەخانێکی مۆدێرن بۆ ئاغاکان تا لەوێوە شەرعییەت بدەن بە دزی و تاڵانکارییەکانی خۆیان و حیزبەکانیان
تا ئەو کاتەی ئەم یە نەفرەتییەی نێوان چەکی حیزب و غرووری عەشیرەت هەڵنەوەشێتەوە، هەرگیز لە کوردستان شتێک دروست نابێت پێی بوترێت “یاسا” یان “دادپەروەری”. ئەم سیستەمە خەریکە کۆمەڵگەی کوردی دەگەڕێنێتەوە بۆ سەدەکانی ناوەڕاست!
Post Comment