چارەسەر نەماوە جگە لە رووخاندنی ئەم دەسەڵاتە

عیرفان عەلی حەسەن

هەرێمی کوردستان، بەبێ ئەوەی مایەی سەرسوڕمان بێت، جارێکی دیکە بە قۆناغێکی قورسی سیاسیی و ئابوورییدا تێدەپەڕێت. وەک هەمیشەش هەر ئەو دوو حیزبەی کە هۆکاری قەیرانەکان، خۆشیان بەرپرسیاری چارەسەرکردنیان.

بەڵام ئایا وەک ئەلبێرت ئەنیشتاین دەڵێت: ‘شێتی هەر ئەوەیە نییە کە هەمان شت دووبارە و چەند بارە بکەیتەوە بەڵام چاوەڕێی هەمان ئەنجام بیت”. وەک ئینگلیز دەڵێن؛ ئەوەی ئێمەی هاووڵاتییچاوەڕێی ئەنجامێکی جیاواز بین لەم دەسەڵاتە وەک ‘دان لە ئەسپی مردوو’ نییە؟
لە ٣٥ ساڵی رابروودا چەندین جار تووشی ئەم قەیرانە سیاسیی و ئابووریانە بووینەتەوە و هەر چارەسەر نەبوون، کەواتە ئێمە لە هەمان بازنە دەسوڕێینەوە. وەک دەڵێن جۆمان چاندووە و چاوەڕێی بەرهەمی گەنمین.
راستیەکەی ئەوەیە پارتیی دیموکراتی کوردستان و یەکێتیی نیشتمانیی کوردستان بۆ هیچ کێشەیەک چارەسەریان نەبووە و ناشیانبێت. حکومەت و دەسەڵاتێکیان دروستکردووە تەنیا خۆیان سەری لەبەر دەردەکەن و جگە لە هەڵوەشاندنەوەی تەواوی ئەوەی هەیە هیچ چارەسەرێکی دیکە لە گۆڕێدا نییە.
بەڵام گرفتی سەرەکی ئەوەیە پارتی و یەکێتی وەک هەر دەسەڵاتێکی دیکەی تۆتالیتار و نادیموکراسی وادیارە بە خۆشی و دەنگدان وازناهێنن و پێویستە خەڵک رێگەی تر بدۆزێتەوە بۆ راماڵینیان.
لەڕاستیدا تاکە رێگەش لە ئێستادا خۆپیشاندانی سەرتاسەری و ملیۆنییە لە تەواوی شارەکانی کوردستاندا بۆ ئەوەی کۆمەڵگەی نێودەوڵەتی ئاگاداری دۆخەکە بێت و پشتیوانی لایەنە ئۆپۆزسیۆنەکان و چالاکییە مەدەنییەکان بکات.
بۆ هێنانەدی ئەم ئامانجە، دەبێ لایەنە ئۆپۆزسیۆنەکان و خەڵکی ناڕازیی پێکەوە هەماهەنگی بکەن و بە یەک دەنگ و دەست بێنە سەرشەقام و بایکۆتی سەرتاسەری رابگەیەنرێت و تاوەکو وازهێنانی دەسەڵات، خەڵک شەقام جێنەهێڵێت.