کەشناسی: شەپۆلێکی تەرزەباران و ئەگەری لافاو هەرێم دەگرێتەوە

-

شارەزایەکی کەشناسی پێشبینی دەکات لە پاشنیوەڕۆی سبەینێ بە
هۆی کاریگەری نزمەپاڵەپەستۆی دەریای سوور وە نزمەپاڵەپەستۆی کەنداو، شەپۆلێکی
باران و تەرزە و ئەگەری لافاو روو لە هەرێم و عێراق دەکات.

ئاراس جەبار، شارەزای کەشناسی پێشبینی دەکات سبەی سێشەمە
24/3/2026 دووبارە لەئەنجامی زیادبوونەوەی کاریگەری نزمەپاڵەپەستۆی دەریای سوور وە
نزمەپاڵەپەستۆی کەنداو، جارێکی دیکە ناجێگیری لەکەش و بەرگەهەوای ناوچەکەدا دروست
ئەبێتەوە و لەکاتەکانی بەیانی بۆ نیوەرۆ هەورە بروسکە و بارانی بەخوڕ و تەرزە لە
ناوچەکانی باشور و ناوەراست و رۆژهەڵاتی عێراق دەستپێدەکاتەوە و پاشان لەکاتەکانی
دوای نیوەرۆ بەدواوە ناوچەکانی سنوری ئیدارەی گەرمیان و پارێزگای کەرکوک و سلێمانی
و هەڵەبجەش ئەگرێتەوە.

هەروەها دەڵێت: کاریگەری ئەم شەپۆلە بۆ ناوچەکانی سنوری پارێزگای
دهۆک و هەولێر و ئیدارەی راپەرین و سۆران بەگشتی لە رۆژی سێشەمەدا لاوازەبێت و ئەگەر
هەیە لەهەندێ شوێن بارانێکی کەم بۆ مامناوەند ببارێت و پلەکانی گەرماش جێگیر ئەبن
، بۆ دوو سبەی رۆژی چوارشەمە 25/3/2026 شەپۆلەکە فراوانتر ئەبێت و بارانی باش و
مامناوەندی پچر پچر سەرجەم ناوچەکانی سنوری پارێزگای دهۆک و هەولێر و ئیدارەی سۆران
و راپەرین ئەگرێتەوە وە لەناوچەکانی سنوری پارێزگای سلێمانی و هەڵەبجە و کەرکوک و
گەرمیان بەهێزتر ئەبێت و ناوبەناو تاوە بارانی بەخوڕ و هەورە بروسکە بەردەوامی ئەبێت
و پاشان کاریگەری ئەو شەپۆلەش لەکاتەکانی ئێوارەی چوارشەمەوە بە تێپەرینی کات
لاواز ئەبێت و کەش جێگیر ئەبێتەوە .

بەپێی ئەو پێشبینییە بڕی بارانبارین لەماوەی هەردوو رۆژی سێشەممە
و چوارشەممە بەم جۆرە دەبێت:

سنوری پارێزگای سلێمانی 30 – 50 ملم

سنوری پارێزگای هەڵەبجە 20 – 30 ملم

سنوری پارێزگای کەرکوک 20 – 30 ملم

سنوری ئیدارەی گەرمیان 30 – 40 ملم

سنوری پارێزگای هەولێر 10 – 20 ملم

سنوری پارێزگای دهۆک 5 – 10 ملم

سنوری ئیدارەی سۆران و راپەرین 15 – 25 ملم

ئاراس جەبار بۆ رۆژی پێنجشەمە 26/3/2026 پێشبینی دەکات: نزمەپاڵەپەستۆیەکی
بەهێز و قوڵ لەسەر ناوچەکانی ناوەراست و رۆژئاوای عێراق دروستببێت کە وەک ئەوەی ئێستا
دیارە لەسەر نەخشەکان کارەسات و لافاو و بای بەهێزی لێچاوەروان دەکرێت بۆ پارێزگاکانی
ناوەراست و باکوری پارێزگای ئەنبار ، ئەم نزمەپاڵەپەستۆیە کاریگەری بۆ سەر ناوچەکانی
هەرێمی ش ئەبێت.

دەشڵیت:
لە ئێوارەی پێنجشەمەوە بۆ رۆژی هەینی بە بارانی بەخوڕ و تەرزە و هەورە بروسکە و
چالاکبوونی با و نزمبوونەوەی پلەکانی گەرما بەڵام وەک ئەوەی ئێستا دیارە بەو شێوەیە
توند و مەترسیدار نابێت بۆ سەر هەرێمی کوردستان هەر چەندە گۆرانکاری لە ئارادا ئەبێت .