کوردستان لە لێواری کەوتن و هەڵخزان
گەیلان محمد کریم
لەم دۆخەدا کە هەمووان دەبنە قوربانی زەرەرمەندی گەورە خەڵکانی ئاساین ، لێرەدا بۆمان دەرکەوت لە ڕابردوو کوردایێتی تەنیا مقاشێک بوو بۆ فرۆشتنی وڵاتێک بە بانکە زەبەلاحەکانی دونیا بە سوودی دوو بنەماڵە ، کە لەسەر ئەم فرۆشتنە بوون بە حووت و هەموومان هەڵدەلوشن.
شێوازی کارکردنی ئەم دوو بنەماڵەیەش لە ڕێگەی دوو حیزبی ڕەنگ جیاواز لە دوو سنوری جیاوازدایە بە شێوەیەک دەستیان گرتووە بەسەر هەموو دام و دەزگا حکوومیەکاندا ، بەرپرسانی یەکەمی حیزبی هەر بە تەلەفۆنێک لە ئۆفیسەکانیانەوە فەرمان دەردەکەن و پاشانیش کارمەندی فەرمانگە و وەزارەتەکان جێبەجێی ئەکەن ، بە شێوەیەک کارەکان شێواوە بەسەر یەکدا وا هەست دەکرێت لە شارێکی گەورە و فراوانی وەک سلێمانی تەنها یەک کەس مافی ئەوەی هەیە بێ لێپرسینەوە هەناسە هەڵمژێت کە ئەویش سەرۆکەکەیەتی و کەسانی تر لە خوار ئەو تا ئەگات بە کۆی دانیشتوانی شارەکە پێویست ئەکات مۆڵەت وەربگرن تا بتواننن بەپێی پێویست و بۆ مانەوە لە ژیان هەناسە بدەن.
بەداخەوە لێستەدا شتێک نەماوە بە ناوی دەسەڵاتی دادوەری ، دادگاکان بە تەواوەتی بوون بە شانۆگەری ڕەنگ سەوز و ڕەنگ زەرد ، هەروەها هێزێک نەماوە ئەرکی پاراستنی کۆمەڵەی خەڵکی کوردستان بێت ، تەنها جگە لە پاراستنی بەرژەوەندیەکانی دوو خێزانە ڕەنگ جیاوازەکە.
هێز و یاسا و دەسەڵات هەموو یەک لەمانە لە چرکە ساتێکدا بە تەنها دەرکردنی فەرمانێک ئەتوانن چارەنووسی هەر تاکێکی نیشتیمان بگۆڕن بۆ هەتایە ، گەر بە ڕەزامەندی یەکێتی و پارتی کار نەکات.
لە لایەکیتریش حیزبەکانی ئۆپۆزیسیۆن ، هەرچەندە ئێستا ئەوان بوون بە ڕابردوو وە کۆتاییان پێ هاتووە ، بەڵام ڕاستیەک هەیە هەرچەندە ئەوان لە ڕێگای هەڵبژاردنەوە هێزێکی هەڵبژێردراوی خەڵکی ناڕازی بوون ئامانجیان ئاسۆیەکی ڕوون بوو هەرچۆن بانگەشەیان بۆ دەکرد ، بەڵام بۆ هەموو لایەک دەرکەوت (تاریکی ناتوانێت تاریکی دەربکات ، ئەو کارە هەر بەس بە ڕوناکی دەکرێت)
ڕووداوەکانی شەوانی ڕابردوو بە ئاشکرا پێمان دەڵێن ، لە هێرشەکەی (لالەزار) دادوەر هەڵە بوو ، هێرش بەر هەڵەبوو ، بەرگری کاریش هەڵە بوو ، بەس بە تەنها سلێمانی ڕاست بوو چونکە لە خەمدا خەڵکەکەی تا بەرەبەیان نەخەوت.
Post Comment