وهزیری رۆشنبیری: كتێبخانهی گشتیی چهمچهماڵ بنیات دهنێینهوه
–
حهمهی حهمهسهعید، وهزیری ڕۆشنبیری و لاوانی حكومهتی ههرێمی كوردستان له پهیامێكدا، وێڕای دهربڕینی هاوخهمی بۆ كهسوكاری قوربانیانی لافاوهكهی چهمچهماڵ و تهكیه و سنووری پارێزگای كهركوك، رایگهیاند كه به هۆی لافاوهكه زیانی زۆر بهر بهڕێوبهرایهتیی ڕۆشنبیری و كتێبخانهی گشتیی چهمچهماڵ كهوتووه.
وهزیری ڕۆشنبیری دهڵێت: “به هۆی ههڵسانی لافاو، بهڕێوبهرایهتیی ڕۆشنبیری چهمچهماڵ و كتێبخانهی گشتیی چهمچهماڵ زیانێكی زۆریان بهركهوتووه و بهو هۆیهوه بهشێكی زۆری كتێبهكانی كتێبخانهكه، تهڕ بوون و كهوتوونهته ژێر لیتهی لافاوهكه و هۆڵهكانی خوێندنهوه زیانی ماددی زۆریان بهركهوتووه”.
وتیشی: “ههوڵی جددی دهدهین و كار بۆ ئهوه دهكهین به زووترین كات، كتێبخانهكه نۆژهن بكرێتهوه و پێداویستییهكانی دابین بكرێنهوه”.
بههۆی ئهو لافاوهی دوێنێ قهزای چهمچهماڵ و چهند ناوچهیهكی گرتهوه، دوو كهس گیانیان لهدهست دا و 12ی دیكهش برینداربوون، جگه لهوهش زیانی ماددی بهر ماڵ و موڵكی هاوڵاتیان و دامودهزگاكانی حكومهت كهوت و لهنێویشیاندا كتێبخانهی گشتیی شارهكه.
Post Comment