لەستایشی ماری و کەشکۆڵ و دەیڤدا

۱

بیرم نیە ماریم بینێبێت، بەڵام یەک دوو جار ڕێکەوتوە دەیڤدم بینیوە، دڵنیام هەردوکیان زۆر عاشقی جوانی و ئەدەب و دیرۆک و هونەرو دیلانێی کوردین، ئەو دوانە عیشقی کوردستان و سلێمانی وایلێکردون لەوڵاتی دوری خۆیانەوە، لێرە خەبات بۆ گەلێکی ستەملێکراوی دەرەوەی دیرۆک بکەن، گەلێک کە سەدان ساڵە گەلە هاو ئاینەکانی ناوچەکە دەیسڕنەوەو جینۆسایدی دەکەن و خاک و وڵاتەکەی داگیرو هەلا هەلا دەکەن، ئەو دوانە عاشقی نالی و سالم و پیرەمێردو کوردی و مەحویین، ئەوان کەشکۆڵیشیان لەو پێناوەدا دروست کرد تا ئەدەب و هونەرو مێژوی کورد بە ئەمەریکاو گەلانی دی بناسێنن، خۆزگا گۆڤارەکەیان درێژەی هەبوایە، گەلی کورد ، گەلێکی میواندۆست و هەمیشە دەرگا وازی میوانە، ئەو ناوەندەی ئەوان کاری تێدا دەکەن، چونکە یەکێک لەسیما جوان و جیاوازەکانی کوردستانە، دەمێکە دانەجیڕەی لێدەکرێت و تۆمەت و تانەی لێدەدرێت، ئێدیارە هۆکارەکەش چیە، سەرەتایی ترین هۆکار بەگژا چونەوەی جیاوازیەو هیچی تر.

۲

تیپی هونەرگەی وڵات لەڕێگەی نمایشێکەوە چیرۆکی لادانی ئەو سەرپێچ و نیقاب و ڕەشکردنەی دوای ستەمی داعشی تاریکی گێڕایەوە، چیرۆکەکە چیرۆکی ژنانی ڕەقەو موسڵ و حەلەب و شوێنگەلی دیکەیەو هێشتاش گرتەو کانیان ماوە، نە دژی ئیسلامەو نەدژی هیچ نەتەوەو گەلێک دژی تاریکی و تاریکپەرستیە، کەدەبوو بەر لەهەر کەس مەلای کوردو بانگخوازی ئیسلامی کورد دەستخۆشیان لێبکات، بەوەی ئیسلامیان لەو تاریکیە جیاکردەوە، کەچی پەلامار دران، لەم یەک دوو ڕۆژەدا هەرچی جنێوی ناشرینە بەو شەنگە کچانەی کورد درا، لەکاتێکا ئەوە بەرهەمی ساڵێ لەمەو پێشەو چیرۆکی کەزێ سۆر چیرۆکێکی درامی گەشەی ئازادی مرۆڤە، جنێوەکان بازاڕی و ناشڕین بوون، حەیفە مەلا بیت، پێش نوێژی بکەیت و ی هەینی کەچی ئەوەندە جنێو بازو ناشرین بی، جوانی مرۆڤ بەشێکی لەگفت و لفتیایە، ڕەخنەیان لێبگرە، لێ جنێو شەرمە.

۳

ئەوانەی ناوێرن بەمحەمەد بن سەلمان بڵێن جنیفەر لۆپێزوفڵان و فیسار چی دەکەن لەسەربەردە ڕەشەکە، بۆ لەوێن، شاییەکی چەند چرکەیی کورد زارەترەکی کردن، وەک چۆن تورکیای ئەردۆغان و ئێرانی ئاخوند لە ئاهەنگ و نەورۆزی کوردان و شایی و دیلانێی کوردی تۆقیون، ئەوانە زۆربەیان دەچنە خانەی لارەخواریی تورک و فارس و عەرەبەوەو هەڵاو شیوەنەکەیان بۆ ئیسلام و خودانیەو بۆ تورک و فارس و عەرەبە، کەپێیان وایە ئەوان هەر دەبێ ژێر دەستەیان بن، یانی بەکوردی و بەکورتی لە ڕاستیا ئەوان خۆیان بە ملکەچ و لارەخواری نەتەوەگەلی دیکە دەبینن، بێ ئەوەی بزانن لەپایتەختی ئەو گەلانە چی دەگوزەرێت، ئەوانە ئەستەنبوڵ و شەوانی سوری تاران لەزاری تورک و فارس خۆیانەوە نازانن، بابچن بزانن کێ دژایەتی ئیسلام دەکات، ئەو دراما تورکینەی کەدەکرێن بەکوردی و ژەهر دەڕێژن یان ئاهەنگێکی کوردانە کە بەگژ تاریکیدا دەچێتەوە.

٤

تۆ کە خۆت باوەڕت بە جبەو نیقاب و حیجابە، ناکاتە ئەوەی ئەوەی باوەڕی پێ نیە نەفرەتی لێبکەی، ئەگەر بڕوات بەجیاوازی و پێکەوە ژیان هەبێت،دەبێت دەست وەرنەدەیتە ژیانی ئەوانی دیکەوە، بیری داعشیانە خزمەت بە پێکەوە ژیانی ئاشتیانە ناکات، بیری داعشیانەتوند ڕەوی دروست دەکات، لەو گەنجانە گەڕێن، هانیان مەدەن بۆ ئەوەی بکەونە چاڵی تاریکیەوە، کەمێک بەزەییتان بەخۆیان نا بەدایک و باوکیاندا بێتەوە، ئاکاری وتن، ئاکاری پەروەردە، ئاکاری هەست و کەوت، بکەنە جێگرەوەی جنێوو پەلامارو هەڕەشە، ئەگەر موسوڵمانن کوردێکی موسوڵمان بن، ئەگەر کوردن، کوردێکی مرۆڤ دۆست بن، هەر پایەداربن دەیڤد و ماری و کەشکۆڵ و هونەرگەی وڵات.