شەوێکی ترسناک و داهاتویەکی ترسناکتر …
فەرمان محمد حاجی
دەستگیرکردنی لاهوری شێخ جەنگی و براکانی و زیاتر لە 200 کەسی دیکە لەکردەیەکی سەربازیدا، هەنگاوێکی ئێجگار مەترسیدارە بۆ پرۆسەی دیموکراسی و ڕای سیاسی جیاواز لەهەرێمی کوردستاندا.
ئەوەی لەسلێمانی ڕویدا پێچەوانەی هەموو عورفێکی یاسایی و دیموکراسی بوو، تەنانەت بۆ دەستگیرکردنی ئەبوبەکر بەغدادیش هێزی ئەمنی بەم شێوەیەو لەم ئاستەدا نەخرابوونەکار، ئەم ڕوداوانە دەیسلەمێنن سلێمانی لە پاشەکشەیەکی گەورەدایە لە مومارەسەکردنی ئازادی سیاسی و سەربەخۆیی دەسەڵاتی دادوەری، بەجۆرێک ئێستا نەحکومەتی هەرێم و نەحکومەتی خۆجێیی سلێمانی دەسەڵاتی سەرۆکی یەکێتیان نیەو ناتوانن لەڕەفتارە فاشیزمەکانی بیوەستێنن.
ئەوەی ڕودەدات پێمان دەڵێت داهاتووی ئەم زۆنە بەرەو تارمایی و تاریکی هەنگاو دەنێت، بەجۆرێک سەرۆکی یەکێتی پێدەچێت ڕێگە لە فرەحزبی بگرێت و چیتر ڕێگەنەدات لەهەناوی یەکێتی و شاری سلێمانی ڕێکخراوی سیاسی دیکە سەرهەڵبدەن و لەدواجاردا ببنە سەرئێشە بۆ یەکێتی.
یەکلاکردنەوەی ململانێی سیاسی بەزەبری هێزی چەکدار نامۆیە بەشاری سلێمانی، مام جەلال بەرامبەر کاک نەوشیروانی نەکرد، بەڵام بافڵ تاڵەبانی تەنانەت پلەی خزمایەتیشی ڕەچاو نەکردو لاهوری شێخ جەنگی لەناوبرد.
ئەم جوڵە سەربازیانەی یەکێتی داهاتووی ئەو حزبە بەرەو نادیاری دەبەن، کەس نازانێت بەیانی چی ڕوودەدات بەڵام تابڵێی کارێکی ناشرین و قێزەون بوو، هەڵکوتانە سەر ماڵ و منداڵ و خێزان و هاوڵاتیانی مەدەنی لەناو ماڵی لاهوری شێخ جەنگی هێندە ناشرینە لەناو هیچ ناشرینیەکدا جێی نابێتەوە.
ئێستا دەبێت چاوەڕێبین بزانین شانۆگەرییە بێ مانایەکە لەکوێ کۆتایی دێت، دوای کوژرانی سێ کەس و برینداربوونی زیاتر لە پانزەکەس و دەستگیرکردنی زیاتر لە 200 کەس لەهۆتێلی لالەزار، بزانین لەناو هۆڵی دادگادا سیناریۆکانی ئەم شانۆگەرییە چۆن نمایش دەکرێن و تۆمەتەکان دادەتاشرێن.
Post Comment