بافڵ تاڵەبانی بۆ شاندی پەیەدە: دەبێت مافی کورد لە سوریای نوێدا مسۆگەر بێت
-
ئەمڕۆ سێشەممە 26ی ئابی 2025، بافڵ تاڵەبانی، سەرۆکی یەکێتیی نیشتمانیی کوردستان لە دەباشان پێشوازی لە غەریب حەسۆ، هاوسەرۆکی پارتی یەکێتیی دیموکرات (پەیەدە) و ساڵح موسلیم، ئەندامی دەستەی سەرۆکایەتیی پارتی یەکێتیی دیموکرات (پەیەدە) کرد.
بەپێی راگەیەندراوی کۆبوونەوەکە بێت، لە دیدارەکەدا نوێترین پێشهاتەکانی رۆژئاوای کوردستان و سوریا گفتوگۆیان لەبارەوەکرا.
بافڵ تاڵەبانی پەرۆشی یەکێتیی نیشتمانیی بۆ پاراستنی بەرژەوەندییەکانی کوردانی رۆژئاوای کوردستان دووپاتکردەوە و رایگەیاند، “دەبێت مافی کورد لە سوریای نوێدا مسۆگەر بێت و وڵاتەکە بە هاوبەشیی هەموولایەک بەڕێوەبچێت و حکومەتی سووریا نوێنەرایەتیی هەموو پێکهاتەکان بکات”.
لای خۆیەوە، شاندی پەیەدە سڵاوی مەزڵوم عەبدییان گەیاندە بافڵ تاڵەبانی و پشتیوانی پەیەدە و هەسەدەیان جارێکی دیکە بۆی دووپاتکردەوە.
Post Comment