کاتێک مەسرور بارزانی گەنجانی بێکار لەبیر دەکات!
شهرام خالید عبدولڕحمان
ئەگەر لە کاتی بانگەشەی هەڵبژاردنەکانی ئۆکتۆبەری ٢٠٢٤دا گوێت لە دروشمەکانی مەسرور بارزانی، سەرۆکی حکومەتی کاربەڕێکەر بگرتایە، پێت وابوو هەرێمی کوردستان لە چەند مانگێکدا دەبێتە دوبەی و کێشەی بێکاری بە یەکجاری کۆتایی دێت! بەڵام دوای تێپەڕبوونی زیاتر لە ساڵێک بەسەر ئەو هەڵبژاردنەدا (کە تا ئێستا لە ساڵی ٢٠٢٦دا هیچ حکومەتێکیشی لێ دروست نەبووە)، واقیعی تاڵی گەنجانی بێکار و دانەمەزراو سەلمێنەری ئەوەیە کە دەسەڵاتی کوردی هیچ پلانێکی ستراتیژی یان ئابووریی نییە بۆ داهاتووی ئەم میللەتە. سەرەڕای ئەوەی ڕێژەی بێکاری لە هەرێمی کوردستان گەیشتووەتە نزیکەی ٢٥٪ و هەزاران دەرچووی زانکۆ لەسەر شەقامەکانن، مەسرور بارزانی بە ئاشکرا ڕایگەیاندووە کە “حکومەت ناتوانێت هەموو دەرچوویەکی زانکۆ دابمەزرێنێت”، و بەرپرسیارێتییەکەی خستووەتە ئەستۆی بەغدا بە بیانووی ئەوەی گوایە لە ساڵی ٢٠١٣ەوە پشکی دامەزراندنی هەرێمیان بڕیوە.
حکومەتی مەسرور بارزانی بەردەوام پاساو بۆ دانەمەزراندنی گەنجان دەهێنێتەوە بەوەی کە دەیەوێت “کەرتی تایبەت” ببوژێنێتەوە و ئابووری هەمەجۆر بکات، بەڵام ئەمە تەنها درۆیەکە بۆ داپۆشینی قۆرخکاری. لە واقیعدا، شتێک نییە بە ناوی کەرتی تایبەت لە کوردستان، بەڵکو ئەوەی هەیە “کەرتی حیزبی”یە! کۆمپانیا زەبەلاحەکانی ناوخۆ، کە خاوەندارێتییەکەیان دەگەڕێتەوە بۆ سەرکردە سیاسییەکانی پارتی و یەکێتی، تەواوی بازاڕیان داگیر کردووە و هیچ هەلێکی کێبڕکێیان بۆ گەنجان نەهێشتووەتەوە. کاتێک گەنجێک بیەوێت پرۆژەیەکی بچووک بکاتەوە، دەبێت باج و سەرانە بداتە حیزب، لە کاتێکدا کۆمپانیاکانی دەسەڵات لە هەموو باجێک دەبەخشرێن. حکومەت بانگەشەی ئەوە دەکات کە لە کابینەی نۆیەمدا گوایە “١٠٠ هەزار هەلی کاریان” دروست کردووە، بەڵام هیچ بەڵگە و داتایەکی دروست بۆ ئەم ژمارە خەیاڵییە بوونی نییە و ڕەخنەگران پێیان وایە ئەمە تەنها بۆ پڕوپاگەندەی میدیاییە.
ئەوەی کارەساتەکەی قوڵتر کردووەتەوە، نەبوونی هیچ پلانێکی ڕاستەقینەیە بۆ ڕزگارکردنی ئابووری لەو ئیفلیجییەی تێیکەوتووە. کابینەکەی مەسرور بارزانی تەنانەت نەیتوانیوە بۆ یەک ساڵیش بودجەیەکی شەفاف و گشتگیر پێشکەش بکات تا بزانرێت داهات و خەرجییەکانی ئەم وڵاتە چۆنە. لەبری دۆزینەوەی هەلی کار یان ئاسانکاری بۆ لاوان، حکومەت خەریکی سەپاندنی باجی قورسە لەسەر خەڵک بە ناوی “پڕۆژەی ڕووناکی” و “هەژماری من”ەوە، کە تەنها بارگرانیی دارایی بۆ خەڵک زیاد دەکەن بەبێ هیچ خزمەتگوزارییەک. لەم نێوەندەدا، ململانێی پارتی و یەکێتی لەسەر پۆستەکانی بەغدا و هەولێر، وای کردووە کە تەواوی دامەزراوەکان پەکبکەون و پرسی دامەزراندن و گەنجان بەتەواوی لە بیربکرێت.
ئایا گەنجێک کە بە هەزاران دۆلار خەرج دەکات بۆ خوێندن، دەبێت چاوەڕێی چی بكات لە دەسەڵاتێک کە تەنانەت ناتوانێت مووچەی ئەو کەسانەش بدات کە دامەزراون؟ تا ئەو کاتەی بازاڕ و داهات لە دەستی چەند کۆمپانیایەکی مافیاییدا بێت، کێشەی بێکاری لە هەرێم چارەسەر نابێت و بێهیوایی لاوان تەنها کۆچی بەکۆمەڵی لێ دەکەوێتەوە.
Post Comment