کەیسی شێروان شێروانی و نا سەربەخۆیی دادگاکان

ئاکام عومەر

قوربانی، لە ئەدەبیاتی ئیسلامی و دۆخی کۆمەڵایەتیی خەڵکیدا، بە کەسێک دەوترێت، کە بەبێ ئەوەی چاوی لە پاداشتێک بێت، ئامادەیە گیانی خۆی لەپێناودا دابنێت، بەڵام بەرچاوی ڕوونە کە بۆ کێ و لەپێناو چیدا ئەو ڕیسکە گەورەیە بە گیانی خۆیەوە دەکات، هەمیشە لە ژینگەی باودا قوربانی وەک سومبل و فیگەرێکی مەزنی موڵکی گشتی لێی دەڕوانرێت، سروود و شانامە بە باڵای تێکۆشانەکەیدا هەڵدەبەسترێت، دەچێتە ناو دێڕی هۆنراوە و گۆرانییەوە.
لێرەدا و پەیوەست بە کەیسی ڕۆژنامەنووسی بەناهەق بەندکراو “شێروان شێروانی” کە قوربانییەکی بێ چەندوچوونی ڕێی خەباتی مەدەنی و چرای ڕۆشنکەرەوەی مەیدانی ڕووبەڕووبوونەوەی نادادی و گەندەڵی و مافخوراوانی هەرێمە، ڕاستییەکی ڕەها خۆی بەیان دەکات، ئایا شێروان لەپێناو کێ و کام چینە مافخوراوەی هەرێم لە سووچی زینداندایە؟ ئایا ئەم کوڕە نەیدەتوانی ببێت بە ڕانتخۆرێکی دەستەمۆی نێو سەدان دەزگەی مێدیایی دەسەڵات، کە مانگانە کۆشێک پارەی حەرام دەرخواردی منداڵەکانی بدات؟
زۆرجار بینیومانە، کاتێک دڕندەیەک پەلاماری ڕانێک ئاژەڵ دەدات، دانەیەکیان ڕاناکات، ڕادەسێ و بەرانبەر دڕندەکە دەوەستێتەوە، ئەگەر هاوڕێکانی پاڵپشتی بکەن، هێرشەکە پێچەوانە دەبێتەوە، دڕەندەکە ڕادەکات و سەرکەوتن بۆ هێزی زۆرینەیە، بەڵام ئەگەر دۆستەکانی لە ئاست ئەو قوربانییەدا نەبن، هەر یەکێکیان خەمی ڕزگارکردنی گیانی خۆی بێت، لەو کاتەدا پاڵەوانەکە دەبێتە قوربانیی کۆمەڵێک هاوڕێی نیوەڕێی ترسنۆک، ئەوانیش بۆ شاردنەوەی ترسی خۆیان هەموویان کۆکن لەسەر ئەوەی تەنانەت وەک هاوڕێش ناوی نەهێنن.

گەر باجی هەڕەشە کردنێکی وەهمی ٥٤
مانگ زیندانیکردن بێت، دەبێت سزای تیرۆرکردنی سەدان کەس و چەندین ڕۆژنامەنووس چە ند بێت ؟!

دەبێت سزای دزین و تاڵانی و شەڕی ناوخۆ و سیویەکی ئاب و شەنگال و برسیکردن و گەندەڵی و سیخوریکردن و بانگهێشتنکردنی سوپای بێگانە بۆ سەر خاکی وڵات چەند بێت؟

حیزبێک هیچ شتێک بە جوانییەکانی وڵات و ئازادیی وتن و سیستەمی حوکمڕانی ڕاستەقینە نایبەستێتەوە و کەچی بڕیاری زیندانیکردنی شیروان ساڵ دوای ساڵ زیاد دەکات.

حیزبێک تەنها بۆ دزین لەم وڵاتە بێت و بۆ خۆشییەکانی لە جێگەی تر بێت ،شایانی ڕێزگرتن نییە و پێویستە زۆر بە توندی و ڕوونی تیری توند و ڕقی نیشتیمان لە دڵی بدرێت !


دەسەڵاتی دادوەری، پایەیەکی سەرەکی هەر سیستمێکی حکومڕانییە، چەسپاندنی دادگەریی و پاراستنی ماف و ئازادییەکانی خەڵکی، وابەستەی ڕۆڵی سەربەخۆیانەی دادگاکانە، هەر کات پایەی دادوەری لەق بوو، ئەوە هیج بەهایەك بۆ حکومڕانی باش نامێنێتەوە و تەواوی کایەکان نیشانەی پرسیاریان دەچێتە سەر، دەکرێت زیندان لە شوێنی تاوانبارانەوە، بگۆڕێت بۆ شوێنی خەڵکی باش و سیاسی و ئازادیخوازان و ڕۆژنامەنووسان.
خۆشبەختانە دۆسییەی شێروان شێروانی، دۆسیەیەکی ئاشکرا و بەرچاوە، لە ڕێگەی ژمارەیەك پەرلەمانتار و ڕێکخراوی نێوخۆیی و بیانی و ڕاگەیاندنەوە، بەڵام پرسی ناسەبەرخۆیی دادگاکان، تەنها لەیەك دۆسیەدا کۆتایی نایەت و ئەم بێ متمانەیی و نیشانەی پرسیارە، درێژکراوەی دەیان دۆسیەی تری شاراوە و ئاشکرای ئەم هەرێمەیە، چونکە لەم هەرێمەی ئێمەدا، چەندین کەیسی خەڵکی بێسەروشوێنکراوی چەند ساڵەمان هەیەو چەندین زیندانیکراومان هەیە، کە چەندین ساڵیان بێ دادگاییکردن لە زیندانەکاندا بردووەتەسەر، کەم نین ئەو منداڵانەی ئەوە بۆ زیاتر لە پازدە ساڵە چاوەڕێی هەواڵی بێسەروشوێنی باوکیان دەکەن، باوکێك کە نەدادگای بینیوە و نەکەس دەزانێت لە چ زیندانێکدایە، تەنانەت نازانرێت ئاخۆ ماون یان لە نێوبراون.
دۆخی هەرێمی کوردستان گۆڕانکاریی ڕیشەیی دەوێ، چونکە ئەوە تەنها دادگاکان نین بەلاڕیدابراون، بەڵکو زۆر لە دامەزراوەو سێکتەرەکانی ئەم هەرێمە لە مەرامی خۆیان لایانپیدراوەو پێویستیان بە گۆڕانکاری و چاکسازی هەیە، تاوەکو بخرێنەوە سەر سکەی راستەقینەی خۆیان، کە خزمەتکردنی خەڵکی و بەرژەوەندی گشتیی و پرۆسەی حکومڕانیەکی ڕەشیدە، بە پێچەوانەشەوە هەمووان دوای لە دەستدانی هەموو شتێك، جگە لە گەستنی پەنجەی پەشیمانی هیچ شتێک نامێنێتەوە. ئەوکاتیش گەر هاوڵاتیان جارێک زەرەرمەندبن، ئەوا دەسەڵاتداران هەزارەها جار زەرەرمەند دەبن و باجی ئەم دۆخە خراپە دەدەن.