ژن؛ ئاشتی و ئاوەدانی
ژن؛ ئاشتی و ئاوەدانی
مێژووی مرۆڤایەتی قەرزاری ئەو دەستە ڕەنگین و دیدگا قووڵانەیە کە ژنان لە هەموو قۆناغەکاندا نیشانیان داوە. ئەگەرچی زۆرجار مێژوو لەژێر سێبەری دەسەڵاتخوازیی پیاواندا نووسراوەتەوە، بەڵام ڕاستییەکە ئەوەیە کە لە پشت هەر وەرچەرخانێکی گەورە و هەر ئارامییەکی بەردەوام، ڕۆحێکی ژنانە هەبووە کە ڕێگری لە داڕمان کردووە. ژن تەنها هاوکاری پیاو نەبووە لە کایەکانی ژیاندا، بەڵکو ئەندازیاری ئەو وردەکارییانە بووە کە ژیانیان بە شایستەی ژین کردووە. لەو شوێنەی پیاوان بە فیکری شەڕ و داگیرکاری سنوورەکانیان خوێناوی کردووە، ژن بە فیکری ژیانەوە هاتووە و هەوڵی داوە پردی دۆستایەتی و ژینگەیەکی تەندروست بۆ نەوەکانی داهاتوو بونیاد بنێت.
ئەمڕۆ کە جیهان لە نێوان قەیرانەکاندا دەتلێتەوە، زیاتر لە هەر کاتێک پێویستمان بەو دیدگا میهرەبان و دادپەروەرانەیە هەیە کە لە سروشتی ژندا بەرجەستەیە. ڕادەستکردنی بەڕێوەبردنی کۆمەڵگە بە ژنان، تەنها داواکارییەکی ڕەگەزی نییە، بەڵکو پێویستییەکی ژیانییە بۆ چاککردنەوەی ئەو وێرانکارییانەی کە عەقڵییەتی شەڕەنگێز دروستی کردوون. ژنی کوردیش، وەک نموونەیەکی باڵای ئازادیخوازی، سەلماندوویەتی کە دەتوانێت لە سەنگەری بەرگری و لە ناوەندی مەعریفەشدا پێشەنگ بێت. «ژن، ژیان، ئازادی» تەنها سێ وشە نین، بەڵکو سێکوچکەیەکە کە ئەگەر ببنە بنەمای بەڕێوەبردن، دونیایەکی دوور لە چەوسانەوە و پڕ لە ئارامیی لێ بەرهەم دێت. با هەموو ڕۆژێک بکەینە ڕۆژی ڕێزگرتن لەو هێزە مەزنەی کە بەبێ ئەو، مانا بۆ مرۆڤبوون نامێنێتەوە.
Post Comment