وەزارەتی پێشمەرگە: جارێکی دیکە بە درۆن هێرش کرایە سەر بارەگایەکمان

-

وەزارەتی پێشمەرگەی
هەرێمی کوردستان لە راگەیەنراوێکدا ئیدانەی هێرش بۆ سەر بارەگایەکی هێزەکانی پێشمەرگە
لە سنووری چەمچەماڵ دەکات.

دەقی راگەیەنراوەکە:

ڕاگەیەندراوێک لە وەزارەتی
پێشمەرگەوە

شەوی
ڕابردوو، جارێکی دیکە تاقمە تیرۆریستییە لەیاسا دەرچووەکان دەستیان دایەوە کردەوەیەکی
تێکدەرانە و لە ڕێگەی درۆنێکی بۆمبڕێژکراوەوە هێرشیان کردە سەر بارەگایەکی هێزەکانی
پێشمەرگە لە سنووری چەمچەماڵ، بە توندی ئیدانەی ئەم پەلامارە دەکەین کە ئامانج لێی
تێکدانی ئاسایش و سەقامگیریی ناوچەکەیە.

دووبارەبوونەوەی
ئەم هێرشە تیرۆریستییانە بۆ سەر بارەگاکانی پێشمەرگە لە کاتێکدایە کە دۆخی ناوچەکە
بە گشتی لەبەردەم قۆناغێکی هەستیار و ئاڵۆزدایە.

جارێکی تر داوا لە فەرماندەی
گشتیی هێزە چەکدارەکانی عێراق دەکەین کە سنوورێک بۆ ئەم دەستدرێژییە بێپاساوانە
دابنێت کە دەکرێنە سەر بارەگاکانی پێشمەرگە.

وەزارەتی پێشمەرگە

٢٢ی ئاداری
٢٠٢٦