وتەبێژی دەزگای ئاسایش: پلانی تیرۆرکردنی بافڵ تاڵەبانی هەبوو
_
عەقید سەلام عەبدولخالق، وتەبێژی دەزگای ئاسایشی هەرێمی کوردستان رایگەیاند، 150 بۆ 200 ئەندامی هێزە ئەمنییەکانی سلێمانی لە هێرشەکەی سەر لالەزار بەشداربوون.
بە وتەی عەقید سەلام عەبدولخالق، هێرشەکە بەم جۆرە بووە، “سەبارەت بە چۆنییەتی دەستگیکردنەکەی دەگەڕێینەوە بۆ چەند خاڵێکی پێش رووداوەکان، ئێمە لە سەرەتاوە بە چەندین شێوازی مەدەنی داواکرابوو ئەو تۆمەتبارانە خۆیان رادەستی هێزەکان بکەن، بەڵام خۆیان رادەست نەکرد.”
ئاماژەی بەوەشکرد، “ئەم رووداوە لە ئەنجامی باکگراوندێکی چەند رۆژە بووە و لەژێر چاودێری ووردی دەزگای ئاسایشدا بوون. ئەم کەسانە پلانگێڕییەکیان هەبوو، پلانیان دانابوو کەسێکی گرنگ تیرۆر بکەن، بافڵ تاڵەبانی، سەرۆکی یەکێتی نیشتیمانی کوردستان یەکێک بوو لەو کەسانە. بەم نزیکانەش ووردەکاری دانپێدانان و پلانەکە بڵاودەکەینەوە؛ چەند کەسێک پلانەکەیان دانابوو، هێزی میلیشیایان دروست کردبوو.”
وتەبێژی دەزگای ئاسایش راشیگەیاند، “لە ئێوارەوە، بە پەیوەندی تەلەفۆنی چەند جارێک داواکراوە خۆیان رادەستی لایەنی پەیوەندیدار بکات چونکە فەرمانی گرتنمان پێبووە، بەڵام رێگەیان نەداوە تەنانەت فەرمانی گرتنەکە لە پرسگەکە بچێتە ژوورەوە. هەروەها بە بڵندگۆ داوا دەکرا کە خۆیان رادەست بکەن بۆ ئەوەی رێگربن لەو رووداوە نەخوازراوە کە بووە هۆی شەهیدبوونی سێ کارمەندمان.”
ئاشکراشی کرد، “سێ شەهید هەیە و ژمارەکە زیاتر نییە لە هێزە ئەمنییەکان، لە لالەزاریش، بەگوێرەی داتای پزیشکی داد، تەنها دوو کەس کوژراون و بە کۆی گشتی لە هەردوولا پێنج کەس.”
سەبارەت بە بەشداری هێزە ئەمنییەکانی سلێمانی، عەقید سەلام باسی لەوەشکرد، کە ژمارەی هێز، بە “دیاریکراوی 150 بۆ 200 کەس بەشداربوون. چونکە زانیاری هەبوو چەندین جۆری چەک لەو ناوچەیە هەبووە. ئەوەش بۆ ڕای گشتی بڵاودەکەینەوە.”
جەختیشی کردەوە لەوەی کە “بە هیچ جۆرێک هێزە ئەمنییەکان درۆنی خۆکوژییان بەکارنەهێناوە و پێشیان نەبووە، بەڵام بە بەڵگە هەبووە چەندین درۆنی خۆکوژی لەنێو لالەزار هەبووە، هەر بەپێی دانپێدانانی یەکێک لەو تۆمەتبارانە، درۆنێکی خۆکوژی لەکاتی تاقیکردنەوەیدا لەنێو لالەزار کەوتبووە خوارەوە”.
“چەندین جۆری چەک و تەقەمەنی لە لالەزار دەستی بەسەرداگیراوە لەوانمە M4، نارنجۆک، دۆشکە، BKC، چەکی نیشانەشکێن و چەکی بێدەنگ و درۆنی خۆکوژی.” عەقید سەلام عەبدولخالق وای وت.
دەنگۆی دەستبەسەرداگرتنی ئاڵتون و پارە لە لالەزار هەبوو، بەڵام ناوبراو ئەم هەواڵە رەتدەکاتەوە و دەڵێت شتی وا نییە، بەڵام چەند جۆرێک تابلۆی جیاوازی ئۆتۆمبێل دۆزراونەتەوە. دەبێت لێکۆڵینەوە لەم بابەتە بکەین.”
هەروەها “بە فەرمی رەتی دەکەینەوە هیچ کەسێک بێ سەروشوێن بێت و هەتا ئێستاش لە 19 کەس زیاتر، هیچ بریندارێکی دیکە نییە.”
وتیشی: “بۆ یەکەمجار ئاشکرای دەکەین کە، تۆمەتباران پلانیان هەبووە کە بە بەکارهێنانی درۆنی بۆمبرێژکراو، یەکێک لە گرتوخانەکان بتەقێننەوە و پلان بۆ چەند شوێنێکی دیکەش هەبووە. ئەمەش بە دانپێدانان هەیە و پلانی بۆ دانراوە بۆ تێکدانی ئاسایش و ئارامی”.
باسی لەوەشکرد، “لەو رۆژەدا سێ درۆنی خۆکوژی بۆ دەباشان بەکارهاتبوو، زانیاریش هەیە لە کوێوە درۆنەکان بەکارهاتوون و لە قۆناغی لێکۆڵینەوەدایە.”
Post Comment