وادەی پڕکردنەوەی فۆڕمی خۆراکی ئەلیکترۆنی لە هەرێمی کوردستان کۆتایی دێت

- سازگار ئەحمەد

سبەینێ دووشەممە 25ی ئابی 2025، وادەی پڕکردنەوە فۆڕمی خۆراکی ئەلیکترۆنی لە هەرێمی کوردستان کۆتایی دێت.

لەوبارەیەوە ئاراس محەمەد، بەڕێوەبەری پسوڵەی خۆراک لە سلێمانی بەی راگەیاند، “سبەینێ کاتژمێر 12:00 شەو وادەی پڕکردنەوەی فۆڕمی خۆراکی ئەلیکترۆنی کۆتایی دێت، تائێستا هیچ بڕیارێک نییە بۆ درێژکردنەوەی وادەیەکەی”.

بەڕێوەبەری پسوڵەی خۆراک لە سلێمانی ئاماژەی بەوەکرد، “هەر هاوڵاتییەک داخڵ بە سیستمەکە نەبووبێت بێبەش دەبێت لە وەرگرتنی بەشەخۆراک و ئاردی مانگانە”.

ئەوەشی خستەڕوو، “هەر هاوڵاتییەک فۆڕمەکەی پڕنەکردبێتەوە لە دوای 1ی ئەیلولەوە بە بڕی 10 هەزار دینار بۆی پڕدەکرێتەوە و یەک هەزار دیناریشی بۆ وەرگرتنی قوتابخانە و نەخۆشخانە وەردەگیرێت”.

بەڕێوەبەری پسوڵەی خۆراک لە سلێمانی داواش لە هاوڵاتییان دەکات لەو وادەی کە ماوە داخڵی سیستمەکە ببن و فۆڕمەکە پڕبکەنەوە، وتیشی، “لە سنووری پارێزگای سلێمانی لە %85ی هاوڵاتییان فۆڕمەکەیان پڕکردووەتەوە”.

ئاراس محەمەد باسی لەوەشکرد، “لە دوای مانگی ئەیلولی ئەمساڵەوە خزمەتگوزاری داخڵبوونی منداڵی تازە و ئەو کەسانەی تازە هاوسەرگیریان کردووە بۆ فۆڕمی خۆراک دەستپێدەکاتەوە”.