هەسەدە: هێرشێکی هێزەکانی سەر بە حکومەتمان لە رۆژئاوای دێرەزوور تێکشکاند
_
هێزەکانی سووریای دیموکرات ‘هەسەدە’ دەڵێت، هێرشێکی هێزەکانی سەر بە حکومەتی دیمەشقیان لە گوندەواری رۆژئاوای دێرەزوور بەرپەرچداوەتەوە.
ناوەندیی ڕاگەیاندنی هێزەکانی سووریای دیموکرات رایگەیاند، هێزەکانیان رووبەڕووی هێرشێک بوونەتەوە کە بنکەیەکی سەربازیی ئەنجوومەنی سەربازیی کەسرەیان لە شارۆچکەی جونەینا کردبووە ئامانج.
بە گوێرەی ڕاگەیەندراوەکە، هێرشبەران چەکی جۆری ‘بی کەی سی’ و فڕۆکەی بێ فڕۆکەوانیان بەکارهێناوە.
ئاماژەی بەوەش کردووە، “هێزەکانی وەڵامی ئەو سەربازانەیان داوەتەوە و زیانی گیانییان بە هێرشبەران گەیاندووە. هەروەها، پێنج ئەندامی هێزەکانی سووریای دیموکرات برینداربوون.”
لە راگەیەندراوەکەدا، هەسەدە حکومەتی دیمەشقی بە “بەرپرسیاری ڕاستەوخۆی” ئەم هێرشانە تۆمەتبار کرد و هێرشەکەی بە هاوکات لەگەڵ زیادبوونی هێرشەکانی ڕێکخراوی داعش لە ناوچەکەدا ناوبردووە.
هەروەها داوای لە حکوومەتی سووریا کردووە، “کۆنترۆڵی سوپاکەی بکات و دەستبەجێ هێرشەکان ڕابگرێت.”
لە بەشێكی دیکەی راگەیەندراوەکەیدا هاتووە، وەزارەتی ناوخۆی ئیدارەی خۆسەر قەدەغەی هاتووچۆی بەشێکی لە شاری ڕەققە لە کاتژمێر 12:00ـی نیوەشەو تا 05:00ـی بەرەبەیان ڕاگەیاندووە. ئەم بڕیارە هاوکاتە لەگەڵ بڵاوەپێکردنی بەرفراوانی هێزە ئەمنییەکان لە چەند گەڕەکێکی شارەکەدا.
سەرچاوە خۆجێییەکان لە سووریا باسیان لەوە کردووە، هێزەکانی سووریای دیموکرات دەیان ئۆتۆمبێلی زرێپۆش و چەکداریان لە دەوروبەری یاریگای ‘ڕەش’ لە ناوەڕاستی ڕەققە جێگیر کردووە.
ئەم رووداوانە چەند جارێکە دووبارە دەبنەوە و لەم ماوەی کۆتاییدا گرژییەکانی نێوان هەسەدە و هێزەکانی لایەنگری حکومەتی سووریا لە ناوچەکانی دێرەزوور پەرەی سەندووە.
Post Comment