هەریەکە لە کوردستانی نوێ و ئاراز شێخ جەنگی هەواڵی یەکتر بە ناڕاست ناودەبەن
_
ئەمڕۆ دووشەممە 25ـی ئابی 2025، ئاراس شێخ جەنگی بەی راگەیاند، هێزێکی کۆماندۆ هەڵیکوتاوەتە سەر ماڵەکەم و دیوارەکانی دەشكێنن.
هەروەها لە هەژماری خۆی لە فەیسبووک ئاماژەی بەوەشکردووە، هێزەکەی کۆماندۆ دەرگایان شکاندووە و ئێستاش خەریکی شکاندنی پەنجەرە و دیوارەکان؛ و بارکردن و دزینی ناوماڵەکەمن.
دوای ئەم رووداوە، رۆژنامەی كوردستانی نوێ، زمانحاڵی یەكێتیی لە وەڵامی قسەكانی ئاراس شێخ جەنگی سەبارەت بەوەی هێزێكی كۆماندۆ چونەتەسەر ماڵەكەی لە گوندی كەلكان (گوندی کەلکان لەڕووی کارگێڕییەوە سەربە ناحیەی خدرانە لە قەزای دووکان) رایگەیاند: “هیچ هێزێکی ئەمنی جوڵەی پێنەکراوە و ئەوەی هەندێ کەناڵی سێبەری پارتی بڵاویی دەکەنەوە گوایە ماڵی یەکێک لە داواکراوانی راکردووی یاسا پشکنینی بۆ کرابێت، جگە لە درۆیەکی شاخدار و بڵاوکردنەوەی ژەهری پشێوی بۆ تێکدانی ئارامیی وڵات، هیچیتر نییە”.
راستەوخۆ دوای هەواڵەکەی کوردستانی نوێ، ئاراس شێخ جەنگی نوسیویەتی: “وەڵامی درۆ شاخدارەکەی (کوردستانی کۆن)، ئەگەر ڕاست دەکەن با ئەو چەتانەی لای ماڵەکەن ڕێگا بدەن هەندێک ڕۆژنامەنوس بچن ڕەسمی ماڵەکە بگرن.”
22ـی ئابی 2025، دوای زیاتر لە سێ کاژێر پێکدادان لە هۆتێل لالەزاری شاری سلێمانی، لاهوور شێخ جەنگی و پۆڵادی برای و ژمارەیەک لە پاسەوانەکانیان دەستگیرکران، لەو کاتەوە هێرشی میدیایی لە چەند لایەنێکەوە دەستیپێکردووە و هەر لایەنەی هەواڵی دژ بە بەرامبەرەکەی بڵاودەکاتەوە. تەنانەت دوێنێ یەکشەممە 24ـی ئاب، مەکتەبی راگەیاندنی یەکێتی، راگەیەندراوی دژی “هەڵمەتی راگەیاندنی میدیای پارتی دژ بە سلێمانی” بڵاوکردەوە.
Post Comment