نێچیرڤان بارزانی: کاری لەپێشینەی حکومەتی هەرێمی کوردستان ئەوەیە چۆن کێشەی مووچە چارەسەر بکات
_
ئەمڕۆ دووشەممە نێچیرڤان بارزانی، سەرۆکی هەرێمی کوردستان رایگەیاند، کاری لەپێشینەی حکومەتی هەرێمی کوردستان ئەوەیە چۆن کێشەی مووچە چارەسەر بکات.
نێچیرڤان بارزانی بە رۆژنامەنووسانی راگەیاند، “وەکو ئاگادارن، هەرێمی کوردستان و بەغدا لە گفتوگۆی چڕدان بۆ چارەسەری کێشەی مووچەی مووچەخۆرانی هەرێمی کوردستان، ئێمە نزیکین، هیوادارین نزیک بین بگەینە چارەسەر، یەکەم ئەولەویەتی حکومەت ئەوەیە چۆن کێشەی مووچە چارەسەر بکات”.
دەربارەی رووداوەکەی رۆژی 22ـی ئابی لالەزار، نێچیرڤان بارزانی وتی: “ئەوەی بەلای ئێمەوە گرنگە هەموو شتەکان بەشێوەی یاسایی بەڕێوەبچێت. دەبێ سەروماڵی هاوڵاتیان پارێزراو بێت و هەرچی رووبدات یاسا سەروەر بێت”.
هەروەها سەبارەت بە هەناردەکردنەوەی نەوت، ئاماژەی بەوەکرد کە، “هەموو هەوڵی ئێمە ئەوەیە بەزووترین کات ببینین نەوت لە بۆریی هەرێمی کوردستانەوە هەناردە بکرێت”.
سەبارەت بە پێکهێنانی کابینەی نوێی حکومەتی هەرێمی کوردستان، نێچیرڤان بارزانی رایگەیاند، “هیچ وادەیەک دیارنییە، بەڵام گفتوگۆی بەردەوام لەنێوان پارتی و یەکێتی هەیە”.
Post Comment