لەتیف رەشید: ئەوەی لە غەززە روودەدات قبوڵکراو نییە
_
لە میانی پێشکەشکردنی وتارێک لە دووەم رۆژی کۆنفرانسی هاوپەیمانیی حیزبە سۆشیال دیموکراتەکانی وڵاتانی عەرەبی لە سلێمانی، د. لەتیف رەشید، سەرۆک کۆماری عێراق رایگەیاند، نا هاوسەنگی هەیە لە گەشەی دانیشتوان و هەندێک وڵات وزەی پێویستیان لەبەردەستدا نییە.
سەرۆک کۆماری عێراق وتیشی: چەند هەڕەشە بەرۆکی وڵاتانی ناوچەکەی گرتووە و داوا دەکەم ئەوانەی لەم کۆنفرانسە میوانن بچن سەردانی هەڵەبجە بکەن و ئاستی دڕندەیی دیکتاتۆری بەعس ببینن.
ئاماژەی بەوەشکرد، سەرۆک مام جەلال دوای خۆی میراتییەکی بەجێهێشت کە جێگەی شانازییە.
د. لەتیف رەشید باسی لەوە کرد، لە وڵاتانی پێشکەوتوو دیموکراسییەت چووەتە خزمەتی دەوڵەمەندەکان و زۆرجار تەکنەلۆجیا بۆ خزمەتی دەسەڵاتداران بەکاردێت و تاکو دێت جیاوازی نێوان هەژار و دەوڵەمەند زیاتر دەبێت.
دووپاتیشی کردەوە کە، ئەوەی لە غەززە روودەدات قبوڵکراو نییە و هەڵوێستی عێراق ئەوەیە کە بە تووندی سەرکۆنەی توندوتیژییەکان دەکات و پێویستیشە دەوڵەتی سەربەخۆی فەڵەستین دابمەزرێت.
Post Comment