لاهور شێخ جەنگی بۆ دەستەی سەربەخۆی مافی مرۆڤ: تەندروستیم باشە و لە ژوورێکی تایبەت دانراوم

-

ئەمڕۆ سێشەممە 26ی ئابی 2025، دەستەی سەربەخۆی مافی مرۆڤ سەردانی لاهور شێخ جەنگی و بەشێک لە دەستگیرکراوەکانیان کرد لە شاری سلێمانی.

لەبارەی سەردانەکەوە دەستەی سەربەخۆی مافی مرۆڤ رایگەیاند، “ئەمڕۆ شاندێکی باڵای دەستەی سەربەخۆی مافی مرۆڤ بە راسپاردەی سەرۆکی دەستە د.مونا یاقۆ سەردانی شاری سلێمانیان کرد، شاندەکە لە گرتووخانەی کانی گۆمە چاویان کەوت بە لاهور شێخ جەنگی لەنزیکەوە گفتوگۆیان لەگەڵ کرد دەربارەی ڕەوشی تەندروستی و شوێنی حەوانەوە و رێکارەکان پرسیاریان لێکرد”.

ئەوەشخراوەتە روو، “ناوبرا ئاماژەی بەوە کرد تەندروستی باشە و لە ژوورێکی تایبەت دانراوەو تەواوی پێداویستیەکانی بۆ دابین کراوە وە هەروەها بە ڤیدیو لەگەڵ خێزانەکەی قسەی کردووە، هەروەها داوای پەرتوکی کردبوو لە ئاسایش کومەڵێک پەرتووکیان بۆ هێناوە، ئاماژەی بەوەشکرد لەوکاتەی کەهاتووە بۆ زیندانی ئاسایش لەکانی گۆمە، رووبەڕووی هیچ توندوتیژی و ئەشکەنجەیەک نەبۆتەوە”.

باس لەوەشکراوە، “دواتر لاهور شێخ جەنگی داوای کردووە کە دۆسیەکەی بەڕێکاری یاسایی بروات و دەستەش چاودێری بکات، هەروەها لەسەر رووداوەکانی ئەو رۆژە گوتی زووتر نوێنەرانی وڵاتانی ئەمریکا و بەریتانیا وفەرەنسا و حکومەتی هەرێمی لێ ئاگادار کردووەتەوە کە ئەو رووداوانە روودەدەن”.

دەستەی مافی مرۆڤ ئاماژەیان بەوەدا، “مافی ناوبراوە رێگە بە پارێزەرەکانی بدرێت سەردانی بکەن و بڕیارە لەماوەیەکی نزیکدا ئەو پرسەش چارەسەر بکرێ و ڕێگە بدرێ بە سەردانی پارێزەرەکان”.

لاهور شێخ جەنگی بە شاندەکەی دەستەی مافی مرۆڤی وتوە، “کەلەکاتی لێکۆڵینەوەکان هیچ توندوتیژیەکی بەرامبەر نەکراوەو هیچ دان پێدانێکی بەزۆری لێی وەرنەگیراوە هەروەها لەوەڵامی پرسیاری تیمی دەستە سەبارەت بە ڤیدیو کردن لەکاتی لێکولینەوە گوتی هیچ کامیرا و ئامێری تۆمارکردن نەبووە لەکاتی لێکولینەوە”.

دەستەکە راشیگەیاندووە، “دواتر تیمەکەی دەستە چاویان بە بەشێک لە دەستگیراوەکان کەوت کە وەک ئەندامی هێزەکەی لاهور شێخ جنگی ناسراون و بەپێی بەدواداچوونی شاندەکەی دەستە ژمارەیان ١٦٢ کەسن وە ئاسایش گوتی ژمارەی کوژراوەکانی هەردوو لا پێنج کەسن، هەروەها ئاماژەیان پێکرد کە ڕۆژانە ڕێگە بەبەشێک لەکەس و کاریان دراوە سەردانیان بکەن وە ئاماژەیان بەوە کردوە لە ئێستادا شوێنیان باشە لەو کاتەی هێنراونەتە ئاسایش رووبەڕووی هیچ تووندوتیژیەک نەبونەتەوە”.

دەستەی مافی مرۆڤ رایدەگەینێت، “هەر کەسێکی نادیارو بێ سەروشوێنە لەو رووداوە دەتوانێ سەردانی نووسینگەی سلێمانی مافی مرۆڤ بکات بۆ سۆراخ کردنی کەسەکانیان، دەستەی سەربەخۆی مافی مرۆڤ یەکەم دامەزراوەی فەرمییە دوای رووداوەکانی سلێمانی سەردانی دەستکیرکراوانی کردبێت”.