رێباز حەملان: ئەگەر بەغدا هەموو داهاتەکان ببات، چۆن حکومەتی هەرێمی کوردستان خەرجییەکانی دابین بکات؟
_
بریکاری پێشووی وەزارەتی دارایی عێراق دەڵێت، حکومەتی هەرێمی کوردستان ئەگەر هیچ خەرجییەکیشی نەبێت، مانگانە پێویستی بە 160 ملیار دینارە تاوەکو خۆی بەڕێوەببات.
رێباز حەملان، بریکاری پێشووی وەزارەتی دارایی عێراق رایگەیاند، ئەگەر سبەی حکومەتی عێراق داوا لە وەزارەتی دارایی عێراق بکات مووچەی مانگی حوزەیرانی مووچەخۆرانی هەرێمی کوردستان خەرج بکات، ئەوا هەر سبەی وەزارەتی دارایی هەرێم 120 ملیاری داهاتی نانەوتی رادەستی بەغدا دەکات.
ئاماژەی بەوەشکرد، حکومەتی عێراق پابەند نییە بە رێککەوتنەکانەوە، رەوا نییە بە حەز و ئارەزووی خۆیان خاڵ دیکە بۆ رێککەوتنەکان زیاد دەکەن.
بە وتەی رێباز حەملان، سوودانی لە کۆبوونەوەکەی ئەمڕۆی ئەنجومەنی وەزیرانی عێراق وتوویەتی، ئەگەر لیژنەکان نەگەنە رێککەوتنێک لەبارەی ناکۆکییەکان لەسەر پرسی داهاتی نانەوتیی هەرێمی کوردستان، ئەوا دۆسیەکە یان ئاراستەی دادگای فیدراڵی دەکرێت، یان ئاراستەی ئەنجومەنی شورای عێراق دەکرێت، تاوەکو یەکلا بکرێتەوە.
دەشڵێت: “ئەگەر حکومەتی عێراق داهاتی نەوت و نانەوتیی حکومەتی هەرێمی کوردستان ببات، کەواتە هەرێم کاروبار و تێچووەکانی چۆن دابین بکات؟”
Post Comment