دەزگای ئاسایشی هەرێم دەستگیرکردنی بکوژی هاوڵاتییەکەی پیرەمەگرونی راگەیاند

-

دەزگای ئاسایشی هەرێم دەستگیرکردنی بکوژی هاوڵاتییەکی بە ناوی “زیاد محەمەد راگەیاند کە دوێنێ لە ناحیەی پیرەمەگرون کوژرا.

لە راگەیەندراوێکدا دەزگای ئاسایشی هەرێم رایگەیاند، “دوای ئەوەی دوێنێ 27/1/2026 لە ناحیەی پیرەمەگرون هاوڵاتییەک کوژرا، دوای بەدواداچوونەکانی بەڕێوەبەرایەتی گشتیی ئۆپراسیۆنەکانی ئاسایش و بەڕێوەبەرایەتیی لێکۆڵینەوە لەسەر ڕووداوەکە، دەرکەوت تۆمەتبارێک بەمەبەستی بردنی بڕێک پارە، بە چەکی جۆری دەمانچە هاوڵاتی (زیاد محەمەد)ی کوشتووە و مەبەستی بووە دوای ئەنجامدانی تاوانەکە بەرەو دەرەوەی هەرێمی کوردستان هەڵبێت”.

ئاماژە بەوەکراوە، “دەستبەجێ بەدواداچوون و لێکۆڵینەوەکان ئەنجامدران بۆ دەستگیرکردنی تۆمەتباری رووداوەکە، توانرا لەماوەی کەمتر لە 24 کاتژمێردا تۆمەتباری بکوژ (ه ، ف ، أ) لەدایکبووی 2006 لەلایەن بەڕێوەبەرایەتی گشتی ئۆپراسیۆنەکانی ئاسایش و بەڕێوەبەرایەتی لێکۆڵینەوە لەشارۆچکەی چەمچەماڵ دەستگیربکرێت”.

ئەوەشخراوەتەڕوو،”لەئێستادا تۆمەتبار بە مادەی 406 لەیاسای سزادانی عێراقی راگیراوە و لێکۆڵینەوە لە دۆسییەکەی بەردەوامە”.