ئەنجوومەنی وەزیران کۆدەبێتەوە و پرسی مووچە تاوتوێ دەکات

ئەمڕۆ چوارشەممە، 23ی تەمموزی 2025، ئەنجوومەنی وەزیرانی هەرێمی کوردستان كۆدەبێتەوە و دوو بڕگە تاوتوێ دەكات.

بە گوێرەی ڕاگەیەندراوی فەرمانگەی میدیا و زانیاری، لە بڕگەی یەكەمدا پێشهاتەكانی ئەم دواییەی تایبەت بە جێبەجێكردنی دواڕێككەوتن و لە یەكترگەیشتنی هاوبەشی نێوان هەردوو حكومەتی هەرێمی کوردستان و حكومەتی فیدڕاڵیی پەسندكراو بە بڕیاری ئەنجوومەنی وەزیرانی هەردوولا سەبارەت بە دۆسیەی مووچە و شایستە داراییەكانی هەرێم و دۆسیەی نەوت و داهاتی نانەوتی تاوتوێ دەكرێت.

لە بڕگەی دووەمدا، كۆنووسی كۆبوونەوەی تایبەت بە جێبەجێكردنی دەقی ڕێككەوتننامەی نێوان حكومەتی هەرێمی كوردستان و حكوومەتی فیدراڵی بە مەبەستی دانانی میكانیزمی ڕێكخستنی كارەكانی دەستەی پێوانەسازی و كۆنترۆڵی جۆریی هەرێم تاوتوێ دەكرێت.