ئەنجومەنی وەزیرانی عێراق بڕیاری ناردنی مووچەی مانگی شەشی فەرمانبەرانی هەرێمی دا

-

ئەمڕۆ سێشەممە 26ی ئابی 2025، ئەنجومەنی وەزیرانی عێراق بە سەرۆکایەتی محەمەد شیاع سودانی، سەرۆک وەزیرانی عێراق کۆبوونەوەی ئاسایی خۆی ئەنجامدا لە کۆبوونەوەکەدا بڕیار لەسەر مووچەی فەرمانبەرانی هەرێمی کوردستان درا.

لە کۆبوونەوەکەدا، بڕیاردرا بە ناردنی مووچەی مانگی شەشی فەرمانبەرانی هەرێمی کوردستان، بە مەرجێک هەرێمی کوردستان بڕی 120 ملیار دیناری داهاتی نانەوتی رادەستی بەغدا بکات.

بەپێی زانیارییەکانیبێت، حکومەتی هەرێمی کوردستان 120 ملیار دینارەکەی ئامادەیە و چاوەڕێی ئەوەبوو ئەمڕۆ ئەنجومەنی وەزیرانی عێراق بڕیاری ناردنی مووچەی مانگی شەش بدات ئەوکات 120 ملیار دینارەکە دەنێرێت بۆ بەغدا.

هەروەها ئەنجومەنی وەزیرانی عێراق بڕیاری داوە، لیژنەکان بەردەوام بن لە گەیشتن بە رێککەوتنی زیاتر لەسەر پرسە جیاجیاکانی تایبەت بە مووچە و بودجە و هەناردەکردنەوەی نەوت.

هەر بەپێی ئەو زانیارییانەی دەستکەوتووە، ئەگەر رێکارەکانی ناردنی مووچە زوو تەواوبکرێت ئەوا سەرەتای هەفتەی داهاتوو دەست بە دابەشکردنی مووچەی مانگی شەشی فەرمانبەرانی هەرێمی کوردستان دەکرێت.