هەڵسوڕێنەری باڵیۆزخانەی عێراق لە لیبیا: 25 کۆچبەری خەڵکی رانیە دەگەرێندرێنەوە هەرێمی کوردستان
_
25 کۆچبەری خەڵکی رانیە لەلایەن باڵیۆزخانەی عێراق لە لیبیاوە دەگەڕێندرێنەوە هەرێمی کوردستان.
ئەمڕۆ یەکشەممە ئەحمەد سەحاف، هەڵسوڕێنەری باڵیۆزخانەی عێراق لە لیبیا رایگەیاند: “سۆراخی 25 کۆچبەری کوردی خەڵکی هەرێمی کوردستانمان کرد و توانیمان بیاندۆزینەوە و لەلای ئێمە پارێزراون. بەم نزیکانە مامەڵەکانی رەوانەکردنەوەیان بۆ هەرێمی کوردستان تەواو دەکرێت”.
بە وتەی ناوبراو، “ئەو کۆچبەرانە خەڵکی شاری رانیەن و لە رووبەرووبوونەوەی کۆچی نایاسایی لیبیادا سۆراخیان کردوون”.
ئاماژەی بەوەشداوە، “لەگەڵ بەڕێوەبەرایەتیی کۆچی نایاسایی لە رۆژهەڵاتی لیبیا توانیومانە ئەو کۆچبەرانە رزگار بکەین. هەموویان خەڵکی هەرێمی کوردستانن و خەڵکی سنووری پارێزگای سلێمانین و نیشتەجێی رانیەن”.
“رێگەیەکی پڕ مەترسییە پێویستە گەنجانی کۆچبەر رێگەی لیبیا نەگرنەبەر” ئەحمەد سەحاف وا دەڵێت.
ئاشکراشی کردووە، سەرەتا لەگەڵ خێزانی ئەو کەسانە قسە دەکەن، دواتر پاسپۆرتیان بۆ دەردەکرێت و بە هەماهەنگی حکومەتی هەرێمی کوردستان دەگەڕێندرێنەوە.
Post Comment