ئاسایش: بکوژانی کرێکارەکەی عەلوەی هەولێر دەستگیرکران
_
ئەمڕۆ سێشەممە، 26ـی ئابی 2025، ئاسایشی هەولێر بکوژانی کرێکارەکەی عەلوەی هەولێری دەستگیرکرد و رایگەیاند: پێنج ساڵ پێش ئێستا کێشەیەکی کۆمەڵایەتییان هەبووە.
بەڕێوەبەرایەتیی ئاسایشی هەولێر لە ڕاگەیەنراوێکدا بڵاویکردەوە، لە ڕووداوێکی تەقەکردندا لە بازاڕی عەلوەی شاری هەولێر هاووڵاتیەکی بە نەتەوە عەرەب بەناوی (سعب عاید سمر) پیشەی کرێکارە کوژرا.
ئاماژەی بەوە کردووە، دەستبەجێ لە لایەن تیمەکانمان بە دواداچوون بۆ ڕووداوەکە کرا و دەرکەوت تۆمەتبارەکان لە چوار کەس پێکهاتوون، دوای ئەنجامدانی تاوانەکەیان بەرەو دەرەوەی شاری هەولێر هەڵاتون، هەربۆیە بە هەماهەنگی لەگەڵ بەڕێوەبەرایەتی ئاسایشی بازگەکانی هەولێر، دوای وەر گرتنی ڕەزامەندی دادوەری لێکۆڵینەوەی ئاسایشی هەولێر ، تۆمەتبارەکانمان دەستگیر کرد، بەناوەکانی(ز ، خ ، س) و(س ، د ، س) و (ح ، خ ، س) و (م ، ع ، د)،کە لە نەتەوەی عەرەب و نیشتەجێی شارەدێی ڕەبیعەی سەر بە پارێزگای موصلن.
هەروەها بەهۆی هەبونی کێشەیەکی کۆمەڵایەتیی بۆ پێنج ساڵ پێش ئێستا دەگەڕێتەوە، ئەم تاوانەیان ئەنجامداوە،لە دوای ئەنجامدانی تاوانەکەیان بەنیازبون بگەڕێنەوە ناوچەکەی خۆیان، لە کاتی دەستگیرکردنیاندا دەستمان گرت بەسەر ئەو چەک و ئۆتۆمبیلەی تاوانەکەیان پێ ئەنجامداوە.
Post Comment